Yaburina 69:7-23

⁷Marigina Alatala Sɛnbɛn Birin Kanna, n nama ne rayagi naxanye yigi saxi i yi. Isirayilaa Ala, n nama findi ne yarabi muxu ra, naxanye i batuma!

⁸E n konbima i tan nan ma fe ra. N bata yagi han!

⁹N bata liga alo xɔɲɛna ngaxakedenne xa, alo fa muxuna n xabilani.

¹⁰I ya banxina fe xaminna n ma, han a n ganma alo tɛɛna. Nanara, e i konbin naxanye tima, ne n tan nan lima.

¹¹N na wuga, n yi sunna suxu, yamaan yi n konbi.

¹²N na kasa dugin nagodo n ma sununi, yamaan yi sabaan so n na.

¹³Naxanye batuma taan so dɛɛn na ne n nafɛyama. Dɔlɔ minne sigin sama, e n magele.

¹⁴Koni Alatala, n na i tan nan maxandima. I ya hinan gbeen waxatin ni i ra n xa. Ala, n yabi i ya marakisi barakaxini.

¹⁵N xunba, n nama bitin boroni. N xunba n yaxune yii, n ba tilinni.

¹⁶I nama tin fufaan yi sa n xun ma. I nama tin n yi n mamin tilinni, hanma n bitin gaburun na.

¹⁷N ma Alatala, n yabi i ya hinanna nun i ya fanni. I firifiri n binni i ya kininkinin gbeeni.

¹⁸I nama i yɛtagin luxun i ya walikɛɛn ma. N yabi iki sa! Bayo n tɔrɔxi.

¹⁹Fa n fɛma i yi n nakisi. N xunba n yaxune yii.

²⁰I a kolon n konbima kii naxan yi, n na yagima, n na yarabima. I n yaxune birin toma.

²¹Konbin bata n bɔɲɛn kala han n yigitɛgɛ. N yengi yi kininkininna a fe ma nun koni se mi na. N yengi yi madɛndɛnna nan ma nun, koni n mi se to.

²²E dabarin sama n ma donseni. Min xɔnla to n suxu, e minse xɔlɛn so n yii.

²³Ala xa e ɲaxaɲaxane findi luti ratixin na e yɛɛ ra. Ala xa e hɛrin findi e suxu xunna ra.