Yaburina 55:13-23

¹³Xa yaxun nan tun yi n makonbima nun, n yi diɲama a bun ma nɛn. Xa n naɲaxu muxun nan tun yi a yɛtɛ yigboma n yɛ nun, n yi n luxunma a ma nɛn nun.

¹⁴Koni i tan na a ra, n lanfana, n bodena, n xɔyi kɛndɛna!

¹⁵En ma lanfamayaan yi ɲaxun Alaa banxini en yi sigan tima yamaan yɛ waxatin naxan yi.

¹⁶Sayaan xa n yaxune ratɛrɛna, e kɛndɛn yi siga laxira yi. Bayo fe ɲaxina e yi e konni.

¹⁷Koni n bata Ala xili, Alatala n nakisima nɛn.

¹⁸N ma mawugan nun kutun xuina a lima nɛn. Xɔtɔnna nun yanyin nun ɲinbanna ra, a n xuiin mɛma.

¹⁹A n niin natangama, n yi keli yɛngɛni hɛrini hali n yaxune to yi wuya!

²⁰Habadan mangana Ala a tuli matima nɛn, a yi n yaxune rabira. Bɛti xuini te. Amasɔtɔ e bata tondi tubɛ. E mɔn mi gaxuxi Ala yɛɛ ra.

²¹N lanfana a xɔyine yɛngɛma. A a layiri xidixine kalama.

²²A fala xuiin ɲaxun fɛnɛn xa koni maraɲaxuna a bɔɲɛni. A fala xuine salaxun alo turena. Koni e sɛgɛn tima alo silanfan xɛnxɛna.

²³I ya kɔntɔfinle lu Alatala ma. A i malima nɛn. A mi tinɲɛ tinxin muxun yi bira mumɛ!