YƐSÃÃ 55:13-23

¹³Kɛ̀ n kpɑntídɛ̀ntɔù weè do n sɑ̃́ɑ̃́ ndɛ̀ bɑ́ nni nyóù, kɛ̀ n dootitɔù weè do n kpɑnnɛ̀ nnɑ nhò sɔ̀rinɛ̀mu.

¹⁴Fɔ̃́ n kó kutɔ̃nkù kou fɔ̃́ɔ̃̀ mɛ nni nwe, nɛ̀ wè ti yɛ̃́ titɔbɛ̀ kpɛti kɛ nɛiti.

¹⁵Tíì do nɑɑti mɛsɑ̀ɑ̀, kɛ niɛ̀ nɛ̀ ditĩ̀nnì kɛ kɔrì Kuyie ncĩ́ɛ̃̀tɛ̀.

¹⁶Mukṹṹ mbɛ̀ dɛ̀ɛ́tɛ́ kɛ̀ bɛ̀ɛ tɑ kudɔnkù bɛfòùbɛ̀, kɛ yɛ̃́ kuyonku bɛ̀ nɛínɛ̀mɛ̀ tipíìtì timɔu.

¹⁷Mí nyóó yú Kuyie nku, kɛ̀ kù n dɛɛtɛ́.

¹⁸N kuɔ̀mmu kɛ sɑ́útí dikṹnweńnì nɛ̀ kuyie nnɛ̀ kuyuoku, kɛ̀ kù kèè n dɑbònnì.

¹⁹Kuù yó n dɛɛtɛ́ kɛ̀ n yɛ̀ sṹɔ̃́ɔ̃́, bɑ́ bɛ̀ɛ̀ n kpɑ̀nnɛ̀ bɛ̀ mɛ nsũmɛ̀.

²⁰Kuyie nyóó keèmu n dɑbònnì kɛ́ bɛ̀ kɛ̃́kùnnɛ, kuù tu okpɑ̀ɑ̀tì sɑ̃́ɑ̃̀. Dɛ kó bɛnìtìbɛ̀ í yóó ceetɛ, bɛ̀ í dé Kuyie.

²¹Dɛ kóo niticiìntò cɑ̀ɑ̀ri o nɛ́pobɛ̀ mbɛ, kɛ tɔ̃ũ mɛtɑummɛ̀.

²²O nɑ́ɑǹtì wɛ̀ɛ̀ti mɛcekùɔ̀ nkɔ̃mɛ mmɛ, kòo yɛ̀mmɛ̀ nɛ́ dɔ́ dikpɑ̀nnì. O nɑ́ɑǹtì yɔ̀ɔ̀ nkɛ pɛ̃ɛ̃tɛ́mu mɛkùɔ̀, kɛ nɛ́ dò mmɛsekontibii.

²³Duɔ́ nti Yiɛ̀ nKuyie nhɑ yɛntotí kɛ̀ kù ndɑ tɔ, kù í yóó yóu kɛ̀ dɛ̀ɛ di osɑ̀ù bìtì!