Yaburina 22:9-30

⁹E naxa, “A tan naxan Alatalaa fe yi, Alatala a ratangama ba? Xa a rafan Alatala ma, a xa a xunba.”

¹⁰Koni i tan nan n naminixi nga kuini, i yi n sa nga kanken ma.

¹¹Xabu n bari lɔxɔni, n taxuxi i ra. N ma Ala nan i ra, xabu n yi nga kuini waxatin naxan yi han iki.

¹²I nama i makuya n na. Tɔrɔn bata maso n na, muxu yo mi na yi naxan n maliyɛ.

¹³N yaxune n nabilinxi alo turane, alo Basan yamanan tura xaɲɛne.

¹⁴E dɛɛne yibixi alo yatane, e wurundunma n ma, e xa n yibɔ.

¹⁵N fangan bata ɲan alo ige bɔxɔnxina. N xɔnne birin bata ba e bode ra. N bɔɲɛn bata liga alo dolen na yilo.

¹⁶N fangan bata ɲan feu! N lɛnna xaraxin bata kankan n dɛ. I bata n sa faxa bɛndɛni.

¹⁷Muxu ɲaxi ganla bata n nabilin alo barene. E bata n yiine nun n sanne mabɔ.

¹⁸N xɔnne birin kɛnɛnni. E yɛɛne kankanxi n na.

¹⁹E bata masɛnsɛnna ti n ma dugine fe ra, e xa e yitaxun e bode tagi.

²⁰Alatala, i nama i makuya n na! N ma sɛnbɛmaan nan i tan na. N mali iki sa!

²¹N niin xunba silanfanna yii. N natanga bareni itoe ma.

²²N nakisi yatani itoe ma. N nakisi burunna turaan fenne ma.

²³N na i xinla ralima nɛn ngaxakedenne ma. N ni i matɔxɔ nɛn yamaan yɛ.

²⁴Ɛ tan naxanye gaxu Alatala yɛɛ ra, ɛ a matɔxɔ. Ɛ tan Yaxuba bɔnsɔnna, ɛ a binya. Ɛ tan Isirayila kaane, ɛ gaxu a yɛɛ ra.

²⁵Bayo, a mi a mɛxi yiigelitɔne tɔrɔne ra, a mi a rabeɲinma. A mi a yɛtagin luxunma a ma. Fɔ a a xandi xuiin namɛ.

²⁶N ni i tantunma yamaan malan gbeeni. N na n ma dɛ ti xuine rakamalima nɛn i yɛɛ ragaxu muxune yɛɛ xɔri.

²⁷Yiigelitɔne xa e dɛge, e lugo. Naxanye Alatala fenma, ne xa a matɔxɔ. Ala xa siimayaan fi ɛ ma habadan!

²⁸Bɔxɔn danna muxun birin e xaxili luma nɛn Alatala xɔn, e yi e yɛɛ rafindi a ma. Siyane bɔnsɔnne birin a batuma nɛn.

²⁹Bayo, Alatala nan mangan na siyane xun na.

³⁰Nafulu kanne fan fama nɛn e dɛgedeni, e a batu. Naxanye birin xɛtɛma bɛndɛni, ne xinbi sinma nɛn a bun ma, naxanye mi nɔɛ e niin nakisɛ.