Y Salmo Sija 71:1-23

¹YYAJAGO, O Jeova, nae jupolo y inangococo: ya chajo mamámajlao para taejinecog.

²Nalibreyo, nii tininasmo ya rescatayo: naapo y talangamo guiya guajo ya unsatbayo.

³Jago y acho y saga para guajo, anae mafatoyo todo y tiempo: jago mannae tinago na jumasatbayo: sa jago y finitmeco yan y castiyujo.

⁴Rescatayo, O Yuusso, juyong gui canae y manaelaye yan y canae y ti manunas yan y manrecto na taotao.

⁵Sa jago y ninanggaco, O Jeova Yuus: jago y inangococo desde y pinatgonjo.

⁶Sa jago mumantieneyo desde y jalom tuyan, jago chumuleyo juyong guinin y tiyan nana: ya y tininajo todo y tiempo guiya jago.

⁷Guajo taegüije y ninamanman gui linajyan; lao jago y megot na guinegüeco.

⁸Y pachotto ubula nii tininamo, an y inenramo todot dia.

⁹Chamoyo yumuyute gui tiempo y inamcojo: yaguin minetgotto esta jocog chamoyo dumidingo.

¹⁰Sa y enimigujo manadingan contra guajo; yan ayo sija y numanangga y antijo, manafaesen entre sija.

¹¹Ylegñija: Diningogüe as Yuus: petsigue ya enchilegüe; sa taya para ulinibregüe.

¹²O Yuus, chamo chachago guiya guajo; Yuusso, nachadig yan para unayudayo.

¹³Polo sija ya ufanmamajlao yan ufanlinachae, ayo y contrarion y antijo; polo sija ya ufantinampe nii minamajlao yan y sinala, y umaliligao y dañujo.

¹⁴Lao guajo juananangga todo y tiempo, yan junalala megae y tininajo guiya jago.

¹⁵Y pachotto usinangan y tininasmo, yan y satbasionmo todot dia: sa ti jutungo y minegaeña.

¹⁶Bae jufalag y minetgot gui as Yuus, Jeova; ya jusangan y tininasmo, magajet, iyomoja namaesa.

¹⁷O Yuus, jago jagasja fumanagüe yo desde y pinatgonjo; yan asta pago jusangan claro nii ninamanman y chechomo.

¹⁸Pago locue anae estayo bijo ya chungeyo, O Yuus chamoyo dumidingo: asta que jusangan claro nii minetgotmo y manmámamaela na generasion, yan y ninasiñamo cada uno ni ayo y ufanmato.

¹⁹Yan y tinasmo locue, O Yuus, sumentaquilo; jagasja unfatinas y mandangculo na güinaja sija: O Yuus, jaye uparejumo?

²⁰Sa jago y fumanuejam mandangculo na pinite yan chinatsaga, siempre unnalâlâjam talo, yan unchulejam talo julo guinin y tinadong y tano.

²¹Aumenta y dinangculoco; yan birajao ya unamamagofyo.

²²Ya guajo locue bae jualaba jao yan y guitala: magajet, y minagajetmo, O Yuusso: yyajago nae jucantaye yan y atpa, O jagoja na Santos guiya Israel.

²³Y labiosso sendangculo minagofña anae jucantayejao tinina; yan y antijo ni jago munalilibre.