SALAMO 71:1-23

¹Iehova e, oi mo na abidadama henimumu; ba durugu, nega ta basie hahemaraigu.

²Emu kara maoromaoro ai ba rauagu bona ba hamaurigu; ba hakala henigu, ba harohogu mauri.

³Egu roho-mauri nadina ai baola, egu kohoro aukana ai baola, ihamaurigu totona; badina be oi na egu nadi-gini bona egu kohoro.

⁴Egu Dirava e, kara dika tauna imana amo ba hamaurigu, kara gageva-gageva bona daḡedaḡe tauna imana amo.

⁵Badina be, Ḡaubada e, egu helaro na oi, Iehova e, tauhaugu negana amo egu abidadama na oi.

⁶Egu vara dinana amo oiemu ai vada na tabe kau; oi ese sinagu bogana amo o abigu. Oi mo na umodaimu hanaihanaimu.

⁷Lau na toa ta, hutuma ediai; a oi na egu roho-mauri gabuna aukana.

⁸Lau udugu na oi ihanamomu ai e honumu, bona oi hairaimu ai danu, dina idoinai.

⁹Baina buruka negana ai basio negegu daure, egu goada e oremu negana ai basio rakatanigu.

¹⁰Badina be inaigu ese e herevalaigumu, egu mauri iabi-ohona totona e bani taomu taudia na e henega boumu;

¹¹e tomu: Dirava ese vada e rakatania; a havaia, ba dabaia tao, badina be asi ihamaurina tauna ta.

¹²Dirava e, dauhai basio noho egu Dirava e, a durugu haraḡa.

¹³Ihabadelaigu taudia na hemarai bona hahebua-tari ese bae abidia, heihi-ihirai bona hedadarai ese bae ḡovadia ahu.

¹⁴A lau be baina helaro Ioulou, bona oi ihanamomu baina habadaia loulou.

¹⁵Udugu ese emu kara maoromaoro baine herevalai, emu hahemauri karadia baine gwaurai dina idoinai, badina be iduahidia na asi dibagu.

¹⁶Ḡaubada Iehova ena siahu karadia baina gwauraidia, oiemu kara maoromaorodia baina imodaidia, oi mo sibomu emu.

¹⁷Dirava e, tauhaugu negana amo vada o hadibagu; emu hoa karadia doini na gwauraidiamu.

¹⁸Taunabunai, ena be baina iahu, huigu baine buruka, to, Dirava e, basio rakatanigu, ela bona oi siahumu baina gwauraia, do bae vara urudia iboudiai ediai.

¹⁹Dirava e, oi siahumu bona emu kara maoromaoro na e dae e laomu. ela bona guba doriva-dorivana. Oi ese kara siahudia vada o kara, Dirava e, daika na oi idaimu?

²⁰Hisihisi dikadia momo amo vada o hahisigu, to vada ba hagoadagu lou; tanobada ena dobu gabudia amo ba hakaugu dae lou.

²¹Oi ese imatauraigu ba habadaia, bona taugu ma ba haloa lou.

²²Egu Dirava e, hatai-hatai ḡauna amo danu baina hanamomu; emu momokani baina hanamoa. Israel ena Helaḡa Diravana e, gitara amo do baina hanamomu.

²³Oi ihanamolaimu anedia baina abi negadia ai, bibinagu na bae lolo, moale dainai, laumagu danu, oi ese o hamauria dainai.