Y Salmo Sija 18:3-15

³Bae juagang si Jeova, ni combiene na mannae todo ni y alabansa: taegüije bae julibre gui enimigujo.

⁴Mato guiya guajo y piniten finatae, ya y minilalag y tinaelaye janamaañaoyo.

⁵Y piniten naftan gaegue gui oriyajo, y lason finatae mato guiya guajo.

⁶Y chinatsagaco nae juagang si Jeova, ya juagang y Yuusso: güiya jajungog gui temploña y vosso, ya y inagangjo gui menaña, jumalom y talangaña.

⁷Ayo nae y tano calamten ya mayengyong, ya y simiento sija y egso manmanyengyong yan mangalamten, sa güiya lalalo.

⁸Cajulo aso gui güiingña, ya guinin pachotña guafe manonggue y pinigan mañila pot este.

⁹Y janamangag y langet ya tumunog: ya teog na jinemjom gaegue gui sampapa y adengña.

¹⁰Ya maudae güe gui jilo un querubin, ya gumupo güe; magajet na gumupo güe gui jilo y papan y manglo.

¹¹Japolo jinemjom para fanatuganña; para y tabernaculuña gui oriyaña; jinemjom y janom, teog na mapagajes guinin y langet.

¹²Pot y minalag gui menaña y teog na mapagajesña malofan: graniso yan pinigan guafe.

¹³Jajulo locue si Jeova gui langet, ya y Gueftaquilo jasangan ni y inagangña: graniso yan pinigan guafe.

¹⁴Ya jatago y flechaña ya manchinalapon: ya magajet, megae na lamlam ya manyinilang.

¹⁵Ayonae esta malie y tinadong y janom, ya janamababa y simiento y tano sija pot y linalatdemo, O Jeova, pot y güinaefen y jinagong gui güiingmo.