Wotet 8:14-20

¹⁴Takaweins liva̱nen Yeisuw igaw nisesus Yelusalem, iliganes min-Samaliy bo itams Yowbad anilivan waseg, mapuna ikayabes Pita son Yon bikines.

¹⁵Pita son Yon isaps, mo initougs silma̱nin Yowbad Kululuwan Towen Bwanabwein binekes kid gamag tasiyas; peinan kweiboug nag inekes, deisa nibapta̱yses yagan Guyaw Yeisuw waseg.

¹⁷Initougs ikous, mo isenas nimes wawous gamag tasiyas, Yowbad Kululuwan mo inekes.

¹⁸Towen Saymon ikin takaweins liva̱nen Yeisuw siwotet ma̱wan, nisenas nimes gamag wawous, Kululuwan Yowbad mo inekes; towen Saymon mo isekes money, ilana, “Money towen kukow, maysan sinap towen. Sivinag sinap towen, namag kid basen gamag wawous va̱gan Kululuwan Yowbad binekes.”

²⁰Pita mo ikawtun taw towen, ilana, “Soum-wan mumoney kov waseg bigabum wadiginasim, peinan kudok kid bukugimwel Yowbad nasiwa̱youb. Ya̱koum tobwag gamag. Nag kweitan muwotet nises wasigeis yakamey. Yak nanoum bo ikaydodog wamatan Yowbad. Kadiloka kulavew amsinap towen kalbaleb; kunitoug Yowbad waseg. Adok mo biwid amsinap, peinan akakin-wan amkameiliw son amsinap kalbaleb bo ika̱lawt nanoum waseg.”