Womu Duro 1:6-17

⁶I ku mɑn gɛm yèn sɔ̃ nɑ tĩri. Sɔ̃ɔwɑ u mɑn kuɑ mɛ. Nɛn sesubu bɑ kɑ mɑn mɔru kuɑ. Bɑ mɑn kuɑ ben reseɛm dɑ̃ɑ gbɑɑrun kɔ̃so. Adɑmɑ nɑ ǹ nɛn tiigiru kɔ̃su.

⁷A mɑn sɔ̃ɔwɔ nɛn kĩnɑsi mi ɑ rɑ wunɛn sɑbenu kpɑre, kɑ mi ɑ rɑ de nu sɔ̃ɔ sure. Kpɑ nɑ kun mɑɑ sirenɛ wunɛn berusebun sɑbenun suunu sɔɔ.

⁸wunɛ wi ɑ tɔn kurɔbu kpuro burɑm kere, ɑ̀ kun yɑm mi yɛ̃, ɑ doo ɑ yɑ̃ɑ gɔ̃ɔn yirɑ swĩi. Kpɑ ɑ wunɛn bonu kpɑrɑ kpɑrobun wɑ̃ɑ yerun bɔkuɔ.

⁹nɛn kĩnɑsi, ɑ kɑ dum niɑ weenɛ ye yɑ Egibitin sunɔn tɑbu kɛkɛ gɑwɑmɔ.

¹⁰Wunɛn burɑ yɑ̃nu nu rɑ de wunɛn bɑɑnu nu mɑn wɛ̃re. Wunɛn wĩirɑ kɑ goonu wɑ̃.

¹¹sɑ ko nun sɑbɑ kuɑ ye yɑ wurɑ kɑ sii geesu mɛnnɛ.

¹²sɑnɑm mɛ sinɑ boko u sɔ̃ kɑ wigibu, nɛn turɑren nuburɑ pusɑ.

¹³Nɛn kĩnɑsi u nuburu dowɑ nge turɑre ye bɑ mɔ̀ miru, ye yɑ sure nɛn tororɔ.

¹⁴Nɛn kĩnɑsi u sɑ̃ɑwɑ nge dɑ̃ɑ wɛ̃ɛ burɑsu. Su rɑ kpiwɑ resɛm dɑ̃ɑ gbɑɑrɔ Engɛdiɔ.

¹⁵nɛn kĩnɑsi, ɑ sɑ̃ɑwɑ kurɔ burɔ. Wunɛn nɔni yi bɑllimɔ nge wɑɑ bɑkɑgii.

¹⁶nɛn kĩnɑsi, ɑ sɑ̃ɑwɑ durɔ burɔ, wunɑ ɑ mɑn wɛ̃re. Bɛsɛn kpin yeru tɑ ko n nɔɔ nɛ nge yɑkɑ bekusu.

¹⁷Dɑ̃ɑ ye bɑ mɔ̀ sɛduru, yerɑ bɑ kɑ bɛsɛn dirun dɑ̃ɑ mwɑɑnɑtiɑ kuɑ. Mɑ bɑ ten yɑri kuɑ kɑ dɑ̃ɑ ye bɑ mɔ sipɛrɛ.