Suuki 1:6-17

⁶Wo naxa n kiri fɔɔrɔxi mato, soge nan n fɔɔrɔxi. N nga xa di xɛmɛe nu xɔnɔxi n ma, e nu n xɛɛma e xa wɛni bilie rawalide. N mu nɔ n ɲɛngi sade n gbe xɔn ma.»

⁷«N xanuntenyi, i xa a fala n bɛ i xurusee dɛ madonma dɛnnaxɛ, alako n naxa lu i fen na malabui tɛmui i booree xa xuruse gɔɔrɛe ya ma.»

⁸«Ginɛ tofanyi fisamante, xa i mu na yire kolon, i xa n ma yɛxɛɛe fɔxi fen, i xa i gbee dɛ madon n ma gɔɔrɛ longori ra.

⁹N xanuntenyi, i tofan alɔ Misira mangɛ xa soe, naxan a ragise bɛndunma.

¹⁰I xa tulirasoee bara i xɛrɛe ratofan, i kɔnyi rayabu kɔnmagore kui.

¹¹Won xa maratofan se gbɛtɛe fen, naxee yailanxi xɛɛma nun gbeti ra.»

¹²«N ma labundɛ xiri nu mɛma, mangɛ xa xulunyi yire.

¹³N xanuntenyi maniyaxi se sase nan na, naxan gbakuxi n xiɲɛe tagi, se xiri fanyi saxi a kui.

¹⁴A xiri luxi nɛ alɔ sansi fuge xiri, naxee kelixi wɛni bilie ya ma En Gedi bɔxi ma.»

¹⁵«N xanuntenyi, i tofan, i tofan. I yae rayabu alɔ ganbɛ.»

¹⁶«N xanuntenyi, i tofan, i tofan. Won na dɛnnaxɛ, ɲooge fanyi bara findi won ma sade ra,

¹⁷sɛdiri wuri salonyie bara findi won ma banxi xunyi ra, sipirɛ wuri bara findi won ma banxi kanke ra.»