Solomon 1:6-17

⁶Tru, skin bilong mi i blak, tasol yupela i no ken ting mi olsem wokmeri nating. San i kukim mi na skin i kamap olsem. Ol brata bilong mi i bin kros long mi na mekim mi i go lukautim ol gaden wain. Olsem na mi no inap lukautim gut skin bilong mi yet.

⁷Yu gutpela pren, mi laikim yu tumas. Bai yu bringim ol meme bilong yu i go we? Bai ol i go long wanem hap bilong painim gutpela gras bilong kaikai? Na long biksan bai ol i go hait we? Yu tokim mi na bai mi no ken hatwok long painim yu. Sapos yu no tokim mi bai mi mas kisim laplap na karamapim pes bilong mi na painim yu namel long ol meme bilong ol arapela wasman.

⁸Pren bilong mi, yu naispela meri tru. Sapos yu laik lukim mi, orait yu bihainim mak bilong lek bilong ol meme. Yu bihainim i go na bai yu lukim gutpela gras bilong ol meme bilong yu i ken kaikai. Dispela gras i stap klostu long ol haus sel bilong ol wasman bilong sipsip.

⁹O yu naispela pren bilong mi, bilas bilong yu i gutpela, olsem bilas bilong ol hos i pulim karis bilong king bilong Isip.

¹⁰Ol bilas i hangamap long gras bilong yu i mekim pes bilong yu i lait. Na yu putim ol gutpela bis long nek na nek bilong yu i lait tru.

¹¹Tasol bai mipela i wokim sampela bilas gol na ol arapela bilas silva, na bai mipela i givim yu.

¹²King bilong mi i slip long bet bilong en, na em i smelim gutpela sanda mi bilas long en.

¹³Pren bilong mi, mi laikim tumas, em i olsem wanpela mekpas paura i gat gutpela smel na i slip long bros bilong mi.

¹⁴Na em i olsem ol plaua i gat gutpela smel na i save kamap long ol gaden wain bilong Engedi.

¹⁵Yu naispela meri tru na mi laikim yu tumas. Na yu tu yu laikim mi olsem na ai bilong yu i lait.

¹⁶Pren bilong mi, yu gutpela tumas. Yu moa yet na mi amamas tru long yu. Dispela gutpela gras i olsem bet bilong yumi.

¹⁷Dispela ol han bilong ol diwai sida i olsem pilo na sapnil bilong haus bilong yumi. Na ol diwai pain i olsem rup bilong dispela haus.