Uraat To Yes Mbaŋooŋa 1:15-24

¹⁵Sawa eez, yes to tighur ila to Yesu tilup di. Yes irau tamoot liim avua tamoot ee (120) ma venen. Petrus imundig iyoon ila lolodi, ve isaav padi ighaze:

¹⁶“Yam toŋvetaz, muuŋ, Avuvu Patabuaŋ ipamundigin kinik David ve ivotia Maaron aliŋa to iŋarua mbeb to ivot pa Yudas. Saveeŋa ineep ila Maaron aliŋa to timbooda, ve aazne anoŋa ivot wa. Pasa, Maaron aliŋa isob pale ighur anoŋa ivot itaghon ye tau ŋgar toni. Yam awatag: Yesu igham Yudas inim taghoniiŋa toni, ve itiŋa taluplup ghiit ve tambesmbees pa uraat to Maaron. Eemoghon muri, Yudas ilaagh toman Yesu koia, ve ipatooŋ di pani, tauto tikisi.

¹⁸Ŋgar to Yudas ighami, deŋia maau. Eemoghon tigham le atia, ve ighol le taan pida eez pani. Eemoghon ila itap izala taan tonowen, le apo ivavaal ve kodkoda imaliŋ.

¹⁹Mbeb tonenen varu ilaan irau tamtoghon tisob to Yerusalem ve tilooŋa. Pughu tonene to tiwaat taan tonowen ila taudi aliŋadi tighaze: ‘Akeldama.’ (Akeldama pughu, nene vene: ‘Taan to siŋ.’)

²⁰“Saveeŋ waaro eez to ineep ila Mbouŋ To Yes Israela, isaav tovene: ‘Ina to nepooŋ pale ŋginiŋa. Tamtoghon eta irau ineep tonowe muul maau.’ “Ve Maaron aliŋa waaro ite isaav ighaze: ‘Tamtoghon ite irau igham ina, ve igham uraat toni to ŋginiiŋ.’

²¹“Tovenen tamtoghon eta irau igham Yudas ina. Leso yeiŋa nipariaaŋ mundigiiŋ to Yesu saveeŋa. Taghita tamtoghon toit eta to inepneep toman ghiit ve itiŋa Yesu talaghlaagh pa sawa to Yoan ŋgeu rughuzaaŋa igham uraat toni, ve inim sawa to Maaron indae Yesu a ipul ghiit, ve imuul iza ila pa sambam.”

²³Petrus isavsaav le isob, ghoro tipayoon ndiran ru: Yosep Barsabas to iza ite Yastus, ve Matias.

²⁴Tipayoon yesuru, ve tisuŋ pa Maaron tighaze: “O Tiina tiei, yom uwatag tamtoghon tisob lolodi. Tovenen ndiran ru tonene, upatooŋ sei to yom ughaze ughuri igham Yudas ina. Leso inim mbaŋooŋa tiom ve igham uraat tiom tonene. Pasa, Yudas, ye ipul muri pa uraat tiom, ve imaat gha ila ndug to yom ughuri pani pataghaaŋ wa.”