Nedenuk kara Tutuin 1:15-24

¹⁵Laꞌe esa, ara rakabua seluk bali, nai rarain hambu hatahori 120. Boe ma Petrus nambariik de kokolak nae,

¹⁶“Basa ina-ama, toranoo ma kaꞌa-fadi nggara ein! Ei bei masaneda neu Yudas, fo fai maneuk kara nuni noo hatahori bubuak esa reu humu Lamatuak Yesus. Hata fo Yudas taok naa, memak ana muste mori-dadi leo naak. Lele uluk Manetualain Dula-dalen pake mane Dauk fo surak laꞌe-neu Yudas talo naa ena.

¹⁷Ndia naa, bakahulun ita hatahorin. Ana oo tungga naue-osa no ai boe.”

¹⁸(Tehuu neu Yudas seꞌo heni Lamatuak Yesus ena, boe ma ana haꞌi nala doi manggenggeok kara raa fo neu hasa nala dae faa. Boe ma dae naa dadi neu ndia mamana mamaten, te ana tuda natono bafan numa naa, losa ndara baꞌe poꞌon ma taꞌin loo dea mai.

¹⁹Basa boe ma hatahorir mulai tui numa bafak esa mai neni bafak esa neu, losa basa hatahorir fo mana leo numa kota Yerusalem ramanene laꞌe-neu Yudas mamaten naa ena. Huu naa de ara foi mamanak naa tungga sira dedeꞌa Aram rae ‘Hakeldama’, sosoa-ndandaan ‘Dae Daak’.)

²⁰Petrus kokolak nakandoo bali nae, “Lele uluk mane Dauk surak memak talo naa nai susura Sosoda Kokoa-kikiok kara ena. Ana surak nae, ‘Elan numa naa fo mamana leleon naa, dadi neu mamana nees; ta bole hambu hatahori leo nai naa bali.’ Boe ma ana surak seluk nae, ‘Ela leo bee na ndia uen naa, ara fee lalin neni hatahori laen neu leo.’

²¹Dadi ita muste sangga hatahori fo nggati Yudas. Ita parluu hatahori esa fo dook ka ena ana tungga sama-sama no ita. Ndia naa, muste hatahori fo mana tungga taa-taa no Lamatuak Yesus neni bee neu a mesan, mulai numa Yohanis sarani Yesus mai. Ana oo mesa kana muste mete-nita no ndia matan boe nae, Lamatuak Yesus nasoda fali numa mamaten mai ena, losa Ana hene fali neni nusa tetuk do inggu temak neu.”

²³Neu Petrus kokolak basa talo naa, boe ma hatahorir fo mana tungga rakabua ruma naa, fee nadek dua. Esa nade Matias ma esa bali nade Yusuf (fo ara rasiꞌe roken rae, Barsabas; naden esa bali, ndia Yustus).

²⁴Boe ma ara hule-haradoi rae, “Amak mana nai nusa tetuk do inggu temak! Amak bubuluk tebe-tebe basa hatahori dalen. Yudas mate laꞌo ela ndia ue-osan ena. De Amak matudu fee ai basa ngga numa hatahori kaduak kara ia mai see ndia Amak here nggati neu Yudas; fo ai soꞌun dadi neu Lamatuak Yesus nedenun.”