15Arlta ingwerel, 120 innganem Jesus-kenh kwertengerl-rnem akarrirrek. Peter-anem rtnerl-alhemel, ikwer-rnem-warl angkek.
16“Atyenh-rnemay, awank-akerr Itnwengel David renh akaltyilek, Judas renh iterl-aretyek, rarl Jesus ahelengkw-rnem-warl ahayiweyenh, rernem renh ipmek atwetyek. Angka nhenh arraty innga. Judas rarl anwekantherr-itwek warrkirrenh. Ran innga Jesus renh ahelengkw-rnem-warl ahayiwek.” Alakenh Peter angkek.
18(Rernem Judas renh man anthek, ra renh-rnem atnwenhey-alhetyek Jesus ikwer-warl. Judas-el apmer renh payemelek-anem, man ikwerel. Judas ra ipmek atwelhek. Ra aytnerl-alhek, ilwemel-anem. Atnalty-rnem aytnek ahern-warl.
19Jerusalem-areny-rnem rernem ingkerrenhel awek, Judas rarl ilwek, Jesus renh ahelengkw-rnem-warl ahayiwek-penh. Judas-arl ikwer-itwek ilwek, rernem apmer renh itnewek Arrkngangketyarr.)
20Peter-el renh-rnem ilek arrpemarl, “Akngey-kenh angka arrwekeleny Psalm pip-itwekan arrwekel aynteyelarl, Judas ra ilwekerr-awaty: ‘Warl ikwerenh arltwanem aynteyenh. Ingwerenty aney-angenh-anem arrangkw innganem. Ingwerenty-anem warrk ikwerenh-warl arrernelhetyek, rarl ilwek-kety.’
21Artwa anyent-anem anwantherr arrernetyek, rarl ilerl-apayntetyek apmer arrpanenh-itwek, Jesus rarl itethirremel akwentek. Artwa anyent akaltyirrek Jesus-angkwarr ywerreyek-atwety, Jesus renharl ra aytarek, renharl John-el baptise-emelek, rarl renh aleth-antey Jesus renh apentek, alker-warl alpekek-atwety.”
23Rernem iterrenh artwa nthenh-apeny rlwanetyek, ranem angkakert anetyek. Artwa anyent Joseph Barsabbas, ingweran Matthias.
24Rernem Akngey-anem ayernek. “Ntwa ingkerrenh iterl-areyel, aleth-antey. Ntwa anwekantherr anayntila, anwantherr artwa anyent arraty rlwanetyek, angkakert anetyek, Judas rarl ilwek-kety, rarl apmwangkwarr amentewarl alhenh.” Apwert atherr-anem irrwerl-warl-athek iwek arrkernelhemel. Apwert ratherr ahern-warl aytnek apek apwert-itwek ayntek. Apwert ikwer-itwek Matthias itna ayntek. Artwa Matthias rantey antengilek. Matthias ikwer-rnem-warl anyentirrek.
Acts 1
Acts 1:15-24