Uluka 23:2-56

²Wa hiri me inna banga ayari, unu gusa “Ta kem unun geme unu hara umu ruba manu, agi kati wa nya ikirfi ima nyanga ba, unu gusa agi memani Asere, Ugomo”.

³Bilatus ma iki me “Ho mani Ugomo a Yahudawa?” Yeso makabirka me ma gu “Wa buka anime”.

⁴Bilatus ma gun anu adandang aka tuma nan anuu gbardang, “Daki ma kem unun ugeme unu pilko ba.

⁵Wa gaawe unu gusa “Ma bunkurko anuu unu bezizi umeme vat uyahuda, matuba ugalili nanu aye abame.”

⁶Sa Bilatus ma kunna anime, ma iki nan unuu nuu Galili mani.

⁷Sa ma rusa unun maran atari ti Hiridua tini, ma tuburko Yeso u hana ahira Hiridus u Jerusalem ati yee me.

⁸Sa Hiridus ma ira Yeso, ma wu apuru arum, barki sa ma nyara u ira ume datti. Mamu kunna abanga ame, ma nyara ma iri imum ibiyau me sa ma wuza.

⁹Hiridus ma iki Yeso timum gbardang, Yeso ma game kabirka me.

¹⁰Unuu adandang aka tuma nan anuu nyerte wa hirri ummu ruba wa nya me ayari.

¹¹Hiridus nan ana nikara nini kono (Ma'Soja) wa zogizi me wa wuzi me nibassa. Wa sukki me udibi udandang wa kurzo me ahira Bilatus.

¹²Barki Hiridus nan Bilatus wazin ruroni inna cece atiyee me (wazin inni erru atiyee ta dumo)

¹³Bilatus ma titi anuu adandang aka tuma nan Agomo dandang nan nigura na nuu.

¹⁴Ma gun we “Ya aye nime unu nuu ugeme kasi unuu sa mazin nuwuza anun wa wuzi imum izenzen, irani ma iko me ashin, daki ma kem me inna bur imumme sa ya booni anicee numeba.

¹⁵Nan Hiridus sa ma kurzo me ahira aru ma ira me inna bur sa abari ahun me ba.

¹⁶“Barki anime indi cobi me in ceki me”.

¹⁷Bilatus maka nya a Yahudawa unun inde anyimo ande sa wa rani akura ani rere uganiya idin keterewa.

¹⁸Wa meki tihunu vat uwe unu gusa “Ceki unuu geme u nyan duru Barabas”.

¹⁹Barabas unuu me sa aka korso me udenge uni rere sa ma guri ahira ahun unuu.

²⁰Bilatus ma kuri ma buki we tize uguna ma ceki Yeso.

²¹Wa wuu tihunu wa gu “Gankirka me, Gankirka me”.

²²Ma gun we uku taru, “Barki nyani, a ya bur ani unuu geme ma wuza shi? Daki makemme unu pilko sa wa bari ahume ba. Barki anime imma Cobo me indi ceki me”.

²³Wa game inti myiran inna za, unu nyara a nyawe me wa gankirka me. Tihunu tuweme tihunguko iruba i Bilatus.

²⁴Abinime Bilatus ma nya we me.

²⁵Ma ceki Barnabas sa maa guri ahira ahun unuu. Ma nyawe Yeso sa wa nyara.

²⁶Sa wa haka nan me, wa gurna nan Siman unanuu Sayirin, ma zeze usuro ani pin, wa canni me ukunti ugankirka ma tarsi Yeso.

²⁷Unu hem unu gura nanuu nan nanee intisso nan tihunu, unu tarsa ume.

²⁸Yeso ma gamirka ma gu “Acaa anu Jerusalem, kati ishinime ba, sooni acee ashi nan na hana ashi.

²⁹Irani barki, tiyee tieze sa wadi gu, 'Ani ruba irum wani anuu zattu yozo, nan tipuru sa daki ta yozo nan na hene sa daki a hamza ba.

³⁰Abini me wadi tubi ugusan na pana 'Rizo aharu', nan napoo, 'Impon duru',

³¹Ingi awuza matiti mazu aname, nyanini idi kem mage sa mawaa?”

³²Ukassu anuu, akari waree wazi nigome nan me tantu kahuname.

³³Sa wa aye ahirame sa atisa “Ukunkuwa”, Wa gankirka me nan akari waree unuu inde atari tinanre unuu inde atari tinangure.

³⁴Yeso ma gu “Acoo, vette ucara uwemen, barki sa wa taawe imume sa wazin unuwuza ba”. Wa acece tirunga tumeme in bizawazawa.

³⁵Anuu wa turi unu hirame, agomo unu wuza ume nibassa, unu gusa “Ma bursa aye ca ma buri nice nume, ingi memani Ugomo Asere nan Asere sa a Zauka”.

³⁶Anani kara nini kono (Ma Soja) wa meki uhaza upuru ume unu wuza ume nibassa, unu ninza ume mei magbarara.

³⁷Unu gusa, “Ingi homan Ugomo wa Yahudawa, bura nicee nuwe”.

³⁸U'ira warani ame “Ugomo wa Yahudawa mazigeneme”.

³⁹Uye anyimo akarime mazogeme sa agankirka we nan me unu gusa “Inzo homani Ugomo Asere? Bura nicee nuwe nan haru”.

⁴⁰Unuu kureme ma tarika me, magu “Uda kunna we biyau ba Asere ba, tunsa imun inde ini ya kem shi?

⁴¹Haru tiraa abame rep, barki ucara urun. Unuu ugeme daki ma cara imum ninba”.

⁴²Ma gu, “Yeso, ringinmi anyimo ati Gomo tuweme”.

⁴³Yeso ma gunme “Kadundura ma gunan huu, kani udizi nan mi akura Asere.”

⁴⁴Inna tii uwui (Azumu kirau in anaree) ahira abee Uhana uniyee.

⁴⁵Masaa mu wui ma inpino. Ugebtu udenge unigurame ujanika atii.

⁴⁶Inna soo, inni nyiran nidandang Yeso ma gu, “Acoo, ma nya Bibe bum atari tuwe”. Sa ma buka anime ma wii.

⁴⁷Sa una nikara nini kono (Usoja U Romawa) ma ira imumme sa ya cukuno anime ma gu “Kadundura unuu geme ma zome ma dini ba”.

⁴⁸Vat nigura nanbu sa wa aye bati iri imumme sa awuza, wa kuri unu tira igiri.

⁴⁹Vat ande sa wa rusa me, nan anee me sa wa tarsa me usuro u Galili, wa tonno pit, unu hira utimumme.

⁵⁰Russani, uru nun maa rani unaniza Isubu, de sa maa rani anyimo anuu hirra. Unuu uririn mani ini ruba ubenki.

⁵¹Unuu ugeme daki ma hem ini mumme sa anuu hirra wa wuza ba nan bi wuzawuza buweme ba. Mee unanuu Yahuda mani ani pin nu Arimatiya mazin nunyara uti Gomo ta Asere.

⁵²Unuu me makem Bilatus, ma iki ikizi Yeso.

⁵³Ma tuzo ini, ma impi ini unu malti uririn, ma ka natta a ire ican upuru uni poo, sa daki amuwuna ire ikizin ba.

⁵⁴Uwui ubibarabara bini nan Asabar a ezi.

⁵⁵Anee me sa wa tarsi Yeso usuro U Galili, wa tarsi waka ira ican me nan nuvati me.

⁵⁶Wa kuri, waka nyara uturari nan mani munya urunta. Wa venke unu wui wa sabar kasi udungara U Musa.