LUKA 23:2-56

²Iwo adayamba kumunamizira aciti: Tamugumana munthuyu alikunamiza wanthu wa mwathu muno. Iye ali kuwalambiza kuti aleke kupima mtsonkho kuna Seza. Ndipo iye ali kulewa pomwe kuti ni Krixtu Mambo.

³Ndipo Pirato adamubvundza kuti: Kodi iwepo ndiwe cadidi mamboi wa ajudeu? Tsono Jezu adamutawira aciti: Imwepo ndimwe muli kulewayu.

⁴Ndipo Pirato adauza akulu-akulu wa azibaba wa ntsembe na wanthu wentse kuti: Ndiri kuwona lini mulandu wace munthuyu.

⁵Tsono iwo adangingimira kwene-kwene, acimbalewa kuti: Umweyu ali kuvungisa misolo wanthu na bzomwe iye ambapfundzisa muJudeya muno, kuyabira kuGalileya mpaka kwentsene kuno.

⁶Pomwe Pirato adabva bzimwebzo adabvunza kuti penu munthu omweyo akhali wa kuGalileya.

⁷Pomwe adadziwa kuti akhali wa kudziko lomwe likhatongedwa na Erody. Ndipo iye adamutumiza kuna Herodyko nakuti iye akhali kuJeruzalema panthawe imweyo.

⁸Pomwe Erody adawona Jezu, adokondwa kwene-kwene thangwe iye akhabva kale mbiri yace. Na tenepo akhafuna kumuwona kuti penu angadacite matsenga.

⁹Ndipo iye akhamubvundza na njira zakusiyana-siyana.Tsono iye akhamutawira lini cinthu.

¹⁰Na tenepo akulu-akulu wa azibaba wa ntsembe na apfundzisi wa mtemo adangingimira kwene-kwene kumumanga mulandu.

¹¹Tsono Erody na acikunda wace anyakulindira adamunyoza na kumutukwana. Ndipo adamubvazika cakubvala ca umambo acimubweza pomwe kuna Pirato.

¹²Pantsiku imweyo Pirato adayanjana pomwe papsa na Erody thangwe iwo akhadapsomezana.

¹³Ndipo Pirato adakonkhana na akulu-akulu wa azibaba wa ntsembe na atongi na mbumba.

¹⁴Ndipo iye adawauza kuti: Mwandibweresera munthyu nakuti mwalewa kuti ali kuvunga misolo wanthu. Na tenepo ndamubvundza mucibva na makutu yanu. Tsono ndiribe kuuwona mulandu omwe muli kumumangayu.

¹⁵Napo ndiye Erody adamubweza kuno, nakuti alibe kuwonambo thangwe lomwe lingamuphese

¹⁶Na tenepo ndini mulanga ndikamala ndicimuleka aciyenda.

¹⁷Bzikhafunika kuti Piratoyo acose munthu m'bodzi m'mkaoko panthawe ya cikondweso ca Paxikwa.

¹⁸Ndipo wanthu wentse adakuwa aciti: “Musiyeni umweyo mucose Balabasi!”

¹⁹Tsono Balabasiyo akhali mkaoko na thangwe ra kunyosa phiringu mu mzinda na kupha wanthu.

²⁰Na tenepo Pirato akhafuna kuti atsudzule Jezu ndipo adawawuza pomwe wanthuwo.

²¹Tsono iwo adanyanyiratu kukuwa aciti: “Mukhomerereni! Mukhomerereni!”

²²Ndipo iye adawabvundza pomwe kacitatu aciti: Kodi umweyu wacita cakuipa canyi? Ndiribe kuwona thangwe lomwe lingamuphese. Na tenepo, ndinimulanga, ndicimuleka aciyenda.

²³Tsono iwo ndipo akhanyanyiratu kukuwa na mphambvu acimuuza kuti amukhomerere. Ndipo iwo adamukonwesa na kukuwako.

²⁴Ndipo Pirato adabvuma kucita bzomwe iwo akhakumbirabzo.

²⁵Adacosa munthu akhakumbira iwoyo omwe akhali mkaoko na thangwe ra kunyosa phiringu na kupha wanthu. Ndipo acipereka Jezu kuti amuciti bzomwe iwo akhafuna.

²⁶Pomwe akhayenda naye, adaimisa munthu m'bodzi dzina lace Simau wa kumzinda wa Sireni. Iye akhacokera kumui winango. Ndipo iwo adamukupikisa mtanda kuti atewere nawo Jezu.

²⁷Na tenepo, nthithi wa wanthu azinji ukhamutewera na akazimbo pomwe akhabzimenya pacifuwa acimbalira na kumubvera ntsisi.

²⁸Tsono Jezu adaceuka aciwauza kuti: Azimai wa kuJeruzalema, lekani kundirira ine-pano. Bzirireni mwekha imwepo na wana wanu!

²⁹Nakuti ntsiku inango imwepo mun'dzalewa kuti: 'Wakusimbidwa mbale omwe an'bala lini, na wale omwe nthumbo yawo ikanati kubala ayai masuku yawo yakanati kumamisa.

³⁰Ndipo ntsiku imweyo an'dzauza mapiri kuti: “Tigwereni!” Na tumapiri kuti: “Timpsinkheni”

³¹Penu wanthu ali kucita bzimwebzi pomwe nkhuni zikali ziwisi, kodi tsono ndiye tani zikadzauma?

³²Ndipo iwo adatengambo pomwe akapondo awiri kuti akaphedwe naye pabodzi.

³³Pomwe adafika nawo pambuto yomwe ikhacemeredwa Nkhadzi, adamukhomerera pamwepo Jezuyo pabodzi na akapondo wale. M'bodzi kuboko ladidi mwinango ladzere.

³⁴Tsono Jezu adalewa kuti: “Baba alelekereni, nakuti iwo an'dziwa lini bzomwe ali kucita.” Ndipo iwo adacita mayere kuti agawane bzakubvala bzace.

³⁵Wanthu omwe akhali pamwepo akhaona bzentse. Na atsogolerimbo wa mbumba akhamunyoza acimbalewa kuti: “Iye adapulumusa wanthu winango, mulekeni abzipulumusembo yekha penu iye ndiye cadidi Krixtu wa Mulungu, Wakudankhukidwa.

³⁶Na acikundambo pomwe kubodzi adamunyoza, adafendera pafupi acimupasa vinyu ya kuwawa acimbalewa kuti:

³⁷Penu iwepo ndiwe mambo wa ajudeu bzipulumuse wekha.

³⁸Ndipo padzulu pace pakhadanemba kuti: “UYU NI MAMBO WA AJUDEU.”

³⁹Na tenepo m'bodzi wa akapondo omwe akhadakhomereredwambo adamutukwana Jezu aciti: “Kodi ndiwe lini Krixtu?” Bzipulumuse wekha na ifembo.”

⁴⁰Tsono mwandzaceyo adamutsimula aciti: Kodi iwepo ulibe mantha na Mulungu? Napo iye wapasidwa nyathwa ibodzi-bodzi na ife.

⁴¹Nyathwa yathu idathemera na bzomwe tacita ife-panobzi. Tsono uyu alibe kucita cinthu cakuipa.

⁴²Ndipo iye adathumizira pomwe kulewa aciti: “Jezu udzandikumbukembo ukadzabwera mu umbambo bwako.”

⁴³Ndipo Jezu adamutawira aciti: “Lero-lino iwepo un'kakhala na ine kudzulu.”

⁴⁴Ndipo yakhali masikati panthawe khumi na ziwiri. Na tenepo dzuwa lidathima kudacita mdima dziko lentse mpaka nthawe zitatu za kumaulo.

⁴⁵Ndipo nguwo yagwatisira M'nyumba ya Mulungu idang'ambika pakati na kati.

⁴⁶Pamwepo Jezu adakuwa kwene-kwene aciti: “Baba, ndiri kupereka mzimu wangu m'manja mwanu!” Pomwe adamala kulewa bzimwebzo adafa.

⁴⁷Pomwe mkulu wa acikunda adawona bzimwebzire ndipo iye adapasa mbiri Mulungu aciti: “Cadidi munthuyu akhali wakulungama.”

⁴⁸Pomwe nthithi wa wanthu omwe ukhadakonkhana pamwepo udawona bzimwebzo, udabwerera kumui ucimbadandaula na kubzimenya pacifuwa.

⁴⁹Na tenepo anantsi azinji wa Jezu na akazi omwe akhamutewera kucokera kuGalileya adakaima patali acimbawona bzimwebzo.

⁵⁰Akhalipo munthu m'bodzi dzina lace Zuze omwe akhali Mphala ikulu. Iye akhali munthu wabwino na wakulungama.

⁵¹Iye akhalibe kubvuma bzomwe bzikhadatonga andzace. Ndipo iye akhadacokera kumzinda wa Alimateya, cigawo ca Galileya. Na tenepo iye akhadikhira Umambo bwa Mulungu.

⁵²Ndipo iye adayenda kukakumbira citanda ca Jezu kuna Pirato.

⁵³Pamwepo iye adakacosa citanda ca Jezu pamtanda acifunyizira panguwo icena acikapendesa paphanga lomwe likhanati kuikhidwa kale munthu.

⁵⁴Ndipo Ikhali ntsiku yakukonzekera Sabudu kuti adzapume.

⁵⁵Akazi omwe akhadacokera kuGalileya acitewera Jezu adayenda naye panthutu acikakawona kupendesedwa kwa Jezu.

⁵⁶Ndipo adabwerera kumui acikakonzekera mafuta yakunuchira. paSabudu iwo adapuma ninga momwe mtemo ukhalewera.