Ulemp 2:8-45

⁸Kë hum di di andoli ţi un, ajaki ŧiink bakţup ţi uţup wi nul?

⁹Ŋwoona Parŧ, na Med na Elamit, na Meŧopotamiya, na Yuda, na Kapadoşiya, na Pont na Aŧiya.

¹⁰Baloŋ bawoona Frigiya na Pamfili, na Ejiptu na ŋfëţ ŋi Libiya ŋanñoguŋ Kuren, baloŋ kë bawoona Rom.

¹¹Baloŋ kë bawo bayuday biki kabuka aţu na bankakuŋ baka, biki Kret, na Barab. Kë andoli ţi un aşë ji ŧiinka baka baţup ţi uţup wi nul iko inuura yi Naşibaţi adoluŋ. »

¹²Bañaaŋ bañoŋar fuţ, baamme uko wi pdo, andoli kaji na aŧënţul : « We uwooŋ uko wi? »

¹³Kë baloŋ başë beŋ baka, aji : « Biki baka pdaan poot. »

¹⁴Kë Ŧimoŋ Piyeer aşë naţa na *banjañan iñeen na aloŋ bukuŋ aşë huuran aŧeem baka aji : « An *bayuday na an bŧi nanfëţuŋ ţi Yeruŧalem, an bŧi nawatan ibaţ naŧiink nabot nate uko wi nji kaţupanaŋ.

¹⁵Nin, bañaaŋ biki baankuji, jibi naşaluŋ. Ŋhum ţi nfa mpoţi.

¹⁶Uko wi *Naţupar Naşibaţi i bajaaŋ bado Yowel abiiŋ aţup uţëpuŋ ţëp adolana hënk.

¹⁷Naşibaţi aji : “Ţi ŋnuur ŋbaañşaani, dbi kawalan Uhaaş wi naan ţi bañaaŋ bŧi. Babukan biinţ na baaţ baluŋ kawo baţupar biki naan, bapoţ na bantohi biki nan baluŋ kado kaţaafi iko inkwoonuŋ du nji, kawin iko inwooŋ yi pbi.

¹⁸Ënhën, dluŋ kawalan ţi ŋnuur mënţ Uhaaş wi naan ţi balempar naan biinţ na baaţ, başë bawo baţupar biki naan.

¹⁹Dluŋ kado iko iñoŋarënaan du baţi duuţ kakak kadiiman iko iweek ţi mboş. Pñaak, bdoo, na udu iluŋ kawo.

²⁰Unuur uluŋ kakak bdëm, pli pakak ji pñaak, ji unuur uweek unuura wi Ajugun ubi udo kaban.

²¹Hënk, ñaaŋ ankluŋiiŋ kahaţ ţi katim ki Ajugun abuur.” »

²²Ŧimoŋ Piyeer akak aji na baka : « An bañaaŋ biki *Iŧrayel naŧiinkan bnuura uko wi nji kaţupuŋ: Naşibaţi ayil Yeŧu i *Naŧaret ayuujna ţi a mlagre na iko iñoŋarënaan iŧum, indiimanuŋ phina pi nul jibi nameeŋ wa an ţi ŋleefan.

²³Ñiinţ aŋ, bawulan a, jibi Naşibaţi adooŋ abi me wa akak aŋal uwo, nafiŋa, wi nadoluŋ kë banwooŋ baanfiyaari bapaŋa.

²⁴Kë Naşibaţi aşë naţana ţi pkeţ, abuurana mnhaj mi pkeţ, pkeţ paanhilan amëbana.

²⁵*Dayiţ aţiiniyaana aji : “Wal undoli dji kawin Ajugun ţi kadun ki naan, iñogën ukaaŋ kë nnaţ aliinŧ.

²⁶Ukaaŋ kë nlilan maakan akuţ ayeeh mnlilan mi naan. Kë uleef ubi wo wo ţi mnhaţ

²⁷ţiki iinkwutan uhaaş wi naan uya ufëţ du mnkeţ, akak awo iinkwutën, nji ñaaŋ nalemparu naweek mpuţ.

²⁸Iyuujën bgah bankţijuŋ du ubida, iluŋ kaŧumanaan na mnlilan ţiki iñogën.”

²⁹« An bayiţ naan, dhilan kaţupan uko wi na mntëŋ: Atemun Dayiţ akeţi, amoya, kë bhër bi nul bawoha ţi uŧaak wi nun.

³⁰Abi wo Naţupar Naşibaţi aşë me kë Naşibaţi abi hoŋa uko uloŋ, amehna ţi kadunul, “aji aluŋ kaţu aloŋ i pşini pi nul ţi pşih.”

³¹« Kë wi wi Dayiţ aŧaruŋ awin kë *Kriŧtu aluŋ kanaţa ţi pkeţ, aşë ţiiniyaan wa aji : “Naşibaţi aanwuta kë aţo du mnkeţ kë uleeful ukak awo uumpuţi.”

³²Yeŧu mënţan, Naşibaţi anaţana ţi pkeţ, kë ŋwo bŧi bamaar.

³³Naşibaţi adeeŋa ţi kadeenu ki nul, kë ayeenk du Aşin nja *Uhaaş wi Naşibaţi, wi ahoŋuluŋ ţfa, aniinkan wa ţi bañaaŋ, jibi nakwinuŋ akuţ aŧiink hënk.

³⁴Ţiki Dayiţ ul, andooŋ awo aampaya baţi aţiini aji : “Naşibaţi Ajugun aji na Ajugun : Ţoon ţi kañen naan kadeenu

³⁵te ndo nţooran başooradu, ido kapafna baka ihoţ.” »

³⁶Ŧimoŋ Piyeer abaañëş bţup aji : « Bañaaŋ biki *Iŧrayel bŧi, nameen bnuura keeri : Yeŧu i napaŋuŋ ţi kruŧ, Naşibaţi adola kë awo Ajugun akuţ awo Kriŧtu. »

³⁷Wi bañaaŋ baŧiinkuŋ uţup waŋ aşë ţëla ţëla, ahepar Ŧimoŋ Piyeer na *banjañan bukundi aji : « Bayiţun, kë ŋbaa do do hum ba? »

³⁸Ŧimoŋ Piyeer aŧeem baka aji « Nawutan pjuban, naţëlëş ŋbida, andoli ţi an aji yeenk *batiŧmu ţi katim ki Yeŧu Kriŧtu, Naşibaţi ahilna amiiran ipekadu. Naşibaţi aluŋ kawulan Uhaaş wi nul.

³⁹Kahoŋ ki nul kawo ki nan, na babukan, na banlowuŋ bŧi, na biki Naşibaţi Ajugun akluŋ kadu'ara. »

⁴⁰Ŧimoŋ Piyeer akak aţiini na baka pa bate abot akooţ baka aji : « Nalowan bañaaŋ bawuţaan biki nahilna nabuuran ŋleef ŋi nan. »

⁴¹Bandinanuŋ uţup wuŋ, bado batiŧmu, kë bañaaŋ banñoguŋ iñeen-week ŋyaaş iñeen ŋwajanţ (3000), bahoţana unuur mënţan ţi pnŧuk pi banfiyaaruŋ Yeŧu.

⁴²Bañaaŋ bakak amëban bnuura pjukan pi *banjañan, amëban ţi uţok na bboofar, ţi pfaaşiir kapoom na pñehan Naşibaţi.

⁴³Bañaaŋ bŧi bawo na palënk ţi ŋleef ŋi baka, ţiki banjañan baji bado mlagre na iko iñoŋarënaan iŧum.

⁴⁴Banfiyaaruŋ Yeŧu bŧi bakak aţok iko yi bakaaŋ bŧi.

⁴⁵Baji bawaap itoh na bka bi baka, kafaşiir, andoli ayeenk kaliŋan na kanuma ki nul.