Los Hechos 2:8-45

⁸¿Imaynataj sapa ujpaj idiomanchispi parlajta uyarichcanchisri?

⁹Caypi cachcancu tucuy nacioncunamanta: Partia, Media, Elam, Mesopotamia, Judea, Capadocia, Ponto, Asia,

¹⁰Frigia, Panfilia, Egipto, Cirene kayllapi caj Libia, Romamanta jamojcunapiwan.

¹¹Waquincuna judío familiapi nacejcuna, waquincunataj judío religionman cutejcuna. Ajinallataj Cretamanta Arabiamantawan jamuncu. ¡Quiquin idiomanchispi sapa uj uyarichcanchis Diospaj musphana jina athun ruwaskancunamanta parlajta!

¹²Tucuynincu musphachcarkancu, ni imata pensayta atispa. Tapucuchcarkancutaj: —¿Ima niytataj munan tucuy cay imari?

¹³Waquincuna burlacuspa, nerkancu: —¡Machaska cancu! —nispa.

¹⁴Pedro apostolcunawan cusca sayarispa, alto vozwan nerkan: “Judiocuna, tucuy Jerusalenpi tiyajcuna, cayta yachaychis, niskaytataj allinta uyariychis.

¹⁵Kancuna machaska caskaycuta creenquichis chaywanpas, mana machaskachu caycu; tutamanta iskon horallaraj canpas.

¹⁶Astawanka profeta Joelpaj niskan junt'acuchcan. Payka nerkan:

¹⁷‘Dios nin: Khepa p'unchaycunapi tucuy runacunaman Espirituyta chayachisaj. Churiyquichiscuna ususiyquichiscunapas Diosmanta parlankacu. Waynacunataj moskoypi jina riconkacu. Machulacunapas moskoycunata moskoconkacu.

¹⁸Chay p'unchaycunapi khariman warmimanpas, tucuy sirviwajcunaman Espirituyta chayachejtiy, nokamanta parlankacu.

¹⁹Janaj pachapi musphanacunata ricuchisaj, cay pachapitaj señalcunata: yawarta, nina laurayta, phuyu k'osnitapiwan.

²⁰Inti tutayanka, quillataj yawar jina puca tuconka, manaraj Señorpaj athun glorioso p'unchay chayamuchcajtin.

²¹Señorta tucuy wajacojcunaka salvaska cankacu.’

²²“Israel runacuna, uyariychis ari. Cayta niyquichis: Nazaret llajtayoj Jesús kancuna uqhupi milagrocunata, musphana jina ruwaycunata, señalcunatawan ruwarkan. Ruwaskanpi Dios ricuchisunquichis pay Diosmanta caskanta. Chayta allinta yachanquichis.

²³Chaywanpas Diospaj ñaupajmantaña waquichiskanman jina kancunaman pay entregaska cajtin, kancuna presota jap'ichinquichis. Wañuchinquichistaj, mana allin ruwaj runacuna chaupipi chacataspa.

²⁴Diostaj causarichin wañuy nanaycunamanta libraspa, imaraycuchus wañoyka mana atipayta aterkanchu.

²⁵Gobernaj David Jesusmanta nerkan: ‘Nokaka ñaupakeypi Señorta ricullajpuni cani. Paña ladoypi pay cajtin, ni ima urmachiwankachu.

²⁶Chayraycu sonkoyka cusicun, simiytaj taquin cusicuywan junt'a. Diospi confiacuspa, causanka tucuy runa cayneyka.

²⁷Imaraycuchus sepulturapi mana sakerpayawanquichu. Nillataj santo sirvejniyquipaj cuerponta ismuchinquichu.

²⁸Causay ñanta ricuchiwanqui. Kanwan cajtiytaj, cusiywan junt'achiwanqui.’

²⁹“Llajtamasicuna, sut'inta niyta munayquichis ñaupaj tatanchis Davidmanta. Payka wañuporkan, p'ampaska carkan, caypitaj nokanchiswan sepulturan cachcan.

³⁰David profeta caspa yacharkan Dios juramentowan prometicuskanta ujnin pariententa gobernajta churananpaj.

³¹Ajinaka ricuchcanmanñapas jinata, Jesucristo causarinanmanta David parlarkan. Nillarkantaj sepulturapi mana quedananta ni cuerponpas ismunanta.

³²Dios cay Jesucristota wañuymanta causarichimorkan. Nokaycutaj tucuy caycunamanta testigo caycu.

³³Pay okhariska carkan, Diospaj paña ladonpi tiyaycunanpaj. Dios, prometicuskanman jina, Santo Espirituta payman korkan. Paytaj chay Espirituta nokaycuman cachamorkan, imaynatachus cunan ricuchcanquichis uyarichcanquichistaj ajinata.

³⁴Mana Davidchu janaj pachaman okhariska carkan; chaywanpas payka nerkan: Dios Señorniyta nerkan: ‘Tiyaycuy paña ladoypi,

³⁵noka enemigoyquicunata atipaspa chaquiyqui uraman churanaycama.’

³⁶“Tucuy Israel runacuna ciertota yachachuncu, Dios cay quiquin kancuna chacataskayquichis Jesusta churan Señor, Cristotaj cananpaj.”

³⁷Chaypi tantaska cajcuna cayta uyarispa, sinchitapuni llaquicorkancu. Taporkancutaj Pedrota waj apostolcunatapas: —Waukecuna, ¿imatataj ruwasajcu?

³⁸Pedrotaj paycunaman contestarkan: —Sapa ujniyquichis Diosman cutiricuychis, bautizachicuychistaj Jesucristopaj sutinpi, Dios juchayquichista perdonananpaj. Ajinapi Dios Santo Espiritunta kosunquichis.

³⁹Cay promesaka kancunapaj, wawayquichiscunapaj, tucuy carupi cajcunapajpiwan. Niyta munan: picunatachus Señorninchis Dios wajayta munan, chaycunapaj cay promesaka.

⁴⁰Caycunawan waj palabracunapiwan Pedro nerkan: —¡Salvacuychis, cay sajra runacunawan cusca mana castigaska canayquichispaj!

⁴¹Ajina Pedropaj willaskanta creejcuna bautizaska carkancu. Chay p'unchay quimsa waranka jina creyentecunaman yapacorkancu.

⁴²Tucuynincu apostolcunapaj yachachiskanpi firme quedacorkancu, tucuy cajnincuta jaywanacuspa, oracionta ruwaspa. Tantaycucuspataj, t'antata partispa junto miqhorkancu.

⁴³Apostolcuna achqha milagrocunata señalcunatawan ruwajtincu, tucuy musphararkancu.

⁴⁴Tucuy creejcunaka ujchaska carkancu, tucuy cajnincuta paycunapura jaywanacuspa.

⁴⁵Jallp'ancuta ima cajnincunatawan vendispa, kolketa jaywararkancu sapa uj pisichicuskanman jina.