Gehegehedira 2:8-45

⁸?Mi vei vaho tua tea, ge ighita udolu ta sopa rongovighi na lei sopa leuda?

⁹Ighita rana Parthia, Media mi Elam, ma rana Mesopotamia, Judea, mi Cappadocia ma rana Pontus, mi Asia,

¹⁰Phrygia, mi Pamphylia, rana Egypt, mi Libya lilighina Cyrene, mana balu itatada tara va butu mai Rome,

¹¹(kolura na Jew ma rana mua Jew, tara lavihaghera na vure tara holopangotia na taluutuni ni Jew), mi ghita na balu na Crete mana Arabia, hauvaa mi ghita udolu ta rongovighi na sopa leuda tara nighi kokokoe, na totobo sule ngangata te nei a God!”

¹²Gaira tara hare mara kanoragha, mara sopa huahuati, “?Na hava na ghanaghana vaghana eni?”

¹³Na balu tara batobatora rana taluutuni ge ara bosa, “Na vure raini tara inu bulebule.”

¹⁴Ma Peter te tughuru tabalili keha kolura rana hangavulu sakai na manevetena, me nia ghaeghahe na manga sule me ghaghua vanira na vure subo, “Aghau na vure ni Jew mi ghau udolu tau haghaghau i Jerusalem, kau rongoviu mai, mu ku tughunia vanighau na ghanaghana eni.

¹⁵Na vure raini tara mua inu bulebule te vaghaa tau ghanaghana na pukuna te vaho so ge tangi hiua itaeni.

¹⁶Ma eni gaia na hava te kalea na hava God te bosaa na prophet Joel te bosadila idania,

¹⁷‘Aeni na hava ku gonia tana sosoko ni bongi, Inau ku vetenaa mai vuvungamiu udolu nigua na Tarunga Tabu. Rana lei dalemiu, na mane mana vaivine, kara bosadilai nina rongorongo God vanira na lei tinoni, rana lei garimane kara righighi na lei mabubu, mana lei tonikama kara maturubole.

¹⁸Eo, ma gaira ghua nigua na tinoni lutu, na mane mana vaivine, ku vetena horua mai nigua na Tarunga Tabu tana lei bongi raini ma gaira kara bosadilai nina rongorongo God vanira na lei tinoni.

¹⁹Inau ku gonighi na lei butuli tana oka i kokou mana vaughilala iani pari sarana igaa na ghabu, na lake, mana kolukolu ni ahu

²⁰Na hina ke kuvihia na pungi mana vula ke liliu ni sisi vaghaa na ghabu, mi murina vaho ge na rongoragha sule ngangata tana bongi vaghana ke mai gaa a Lord.

²¹Vaho, ge ahei ke nongia Lord nia na Ahagu, ke vavola.’ e ghaghua.

²²“Aghau rana Israel, kau rongovighi mai na lei bosa raini, a Jesus ni Nazareth eni, God te hea mai na maana i kokou, me utuni sughua nia na lei butuli mana vavaghaha te butu mai tua ta God, itatana gaia. Mi ghau heghemiu tau ghilala, na pukuna te kale i ghobumiu.

²³Taonia nina padalaghi God ge diki ghanaghana dilaa nia tua a Jesus, ighau tau lubatia tana limadira rana hahi ge kara patokia.

²⁴Ma God te tughuru vaghini olia tana mate me va tatavahalea ta nina maana na mate itatana, na pukuna ke mua tangomana na mate ge ke lagavulea.

²⁵Mana vunaghi haba David te kokoe tughua me ghaghua, “Inau tu ghilalaa a Lord God te kabu haia itagua, ge ku mua ghoi mataghu tua, na pukuna gaia tana lilighigu.

²⁶Mi nau te vonughiu na togotogo mana rivurivu, mi nau tu holohabaa, ma sakai manaa ke mate na huligu, Gaia ke ghoi nea ge ke ghoi vola oli

²⁷Na pukuna u ghilalaa ke mua sania na tarungagu i Betidalo, me ke mua lubatia nimua na puku ni tinoni lutu tabu ke sele tana beku.

²⁸Gaia te tatea vaniu na halautu te huliu va tana vola, me ke ghaha koluu ke me ke vonughiu haia na togotogo.”

²⁹“Aghau na lei hoghogu, au ghilalaa tua a kukuada vunaghi haba David te mate mara tavughia tua, mana tavughina te ghahaa so iani taeni.

³⁰Agaia na prophet, me ghilalaa na hava te bahua nia God, ma God te nia papari, ge a siki sakai mughua tana kemana David ke vunaghi vaghaa David.

³¹David te diki righi kalea tua na hava God ke gonia i kise, ge nia kokoe na tughuru oliana na Messiah, ge bosa, “Agaia te mua lubatia ge ke ghahaa i Betidalo, ge ke sele na hulina tana beku.”

³²God te tughuruvaghinia Jesus sania na mate, mi ghai tai righi udolua te utuni.

³³Agaia Jesus tara lavia va tana pala madolona God a tamana, me hea na Tarunga Tabu te bahua nia tua. Na hava tua tau righia mau rongovia, gaia eni na sonihalavu te vaheghita mai.

³⁴Na hulina David te mua dato i kokou te vaghaa Jesus, me bosa tatea vamua me ghaghua, “Lord God te bosa vania nigua na Lord - ‘Sopou iani tana pala madologu

³⁵polo ku taluhorura ghamua na levunimate sarani tuamu.’”

³⁶“Ghau na vure udolu ni Israel, kau ghilala utoa tua Jesus eni agaia tau patokia, ma God te nea ge ke Lord me Messiah!”

³⁷Tana bona na vure tara rongovia, ge ra ghilalaa tara hahi sughua, ge ara huatira Peter ma rana balu manevetena, “?Ghau hoghomami, na hava kai gonia?”

³⁸Peter te ghaghua vanira, “Sasakai itamiu ke tughulio, ge ke vulitabu tana ahana Jesus Christ ge a God ke talukehai na paluna me ke lavipangotia nina sonihalavu God na Tarunga Tabu.

³⁹Anina baubahu God eni te gonia vanighau, ma vanira lei dalemiu, ma rahei ghua tara sagau - vanighita udolu Lord dida na God te hologhita.”

⁴⁰Ma Peter te bosa vanira nia te subo ni totobo, me ghaghua, “Kau vavolaghau heghemiu tana totoro ke mai vanira rana vure dika raini.”

⁴¹Subo itadira tara taluutunia nina rongorongo mara vulitabu, mete manana e tolu na togha ni tinoni tara pada haghera tana ovu na dani vaghana eni.

⁴²Gaira tara lavilaga na naunau itadira rana manevetena mara sakaisonikolu tana vanga mana kokoeliulivuti.

⁴³Me subo na butuli, mana lei totobo haeharegha tara nei lei manevetena, mana vure subo te vonughira na hare mana kikinima.

⁴⁴Agaira udolu tara taluutunia Jesus tara kabu veidolovi mara nighi veihahangai lei didira lologho.

⁴⁵Ma gaira tara nighi hunulu balu didira totobo mana lologho, mara tuvalighi na rongo ighobudira taonia na hava te sopa manadira.