HECHOS 2:8-45

⁸¿Pezee rnii men xdiiz be te te be?

⁹Nee ndxin men-Partia, men-Media, men-Elam, men-Mesopotamia, men-Judea, men-Capadocia, men-Ponto, men-Asia,

¹⁰men-Frigia, men-Panfilia, men-Egipto, no le men-Libia ne nak guex Cirene, no le men-Roma. Gwrol ménree nak men-Israel axtegue ne wal men. Gwrol zeg men gyed wlaleedx Dëdyuzh zegne rlaleedx men-Israel Dëdyuzh.

¹¹No ndxin ke men-Creta no le men-Arabia. ¡Per yrandxee be ron be rzëët men kon xdiiz be yra gyelenzoon ne rlaa Dëdyuzh!

¹²Kesentyent wzee wzak yrandxee mén guin axtegue nandet men pe wuu lextoo men, lex wnabdizlsaa men, re men: ―¿Goxleg rna yra neree?

¹³Per nuu men lel wzhidxno, re men: ―¡Rzudxen yra ménree!

¹⁴Lex wzuli Bëd tese yra Bëd schibteb poxter, ndípse wnii Bëd, re Bëd: ―Men-Israel no le yra mén ne nuu Jerusalén, gugaknan neree yra de no wen wenendxee gugon logne yna noo lo de.

¹⁵Yra ménree rzudxden men zegne nuu lextoo de, porke penendxee beygaa rsil.

¹⁶Neree ne kayak, laa we nga wzëët profet-Joel chene re men:

¹⁷Re Dëdyuzh: “Chene che lultim dxe yxaal noo XEspíritu noo gaknonen yrandxee mén. Yra zhingaan men no le yra zhinzaap men yzëët diiz ne guu noo lextoo men; yra menyu, nuu ne ylalo lo men; le yra mengol nexgyëëlen lo mkaal.

¹⁸Chene ydxiin dxe guin, yxaal noo XEspíritu noo gaknonen yra mgyeey no le yra wnaa ne kalaa xdxiin noo, lex yzëët men diiz ne guu noo lextoo men.

¹⁹Le gyeybaa konyoo noo ne yzee sak mén, le gyëzlyu tsuu beey ne nak zegnak ren, zegnak bël, zegnak bëwguux.

²⁰Gaknkeb lo ngbiz, le mëëw gak zegnak ren antes ne ydxiin dxe ne nzhoo no ne nzoon ne chiid Crist.

²¹Yrandxee mén ne ynab lo Dëdyuzh, sláá men lo dol.”

²²’Men-Israel, gugon yra diizree ne yzëët noo lo de: Wbonyoo Dëdyuzh xgyelnon Jesus men-Nazaret por yra gyelmilaguer ne wlaa Ne nes lo de yra de no le yra beey ne wzee wzak de, no nan de ne nli we.

²³Wlaa de Jesus zegne che wlebleedx Dëdyuzh no zegne che nan Dëdyuzh axtegue chekwlo. Wnëëz de Ne yra de wdekwent de Ne lo menmal chen ykaa men Ne lo kruz guet Ne.

²⁴Per wneban Dëdyuzh Ne no wselaa Dëdyuzh Ne lo gyelgut, porke gundet gyelgut gan lo Ne.

²⁵Laa xkwent Ne nga re rrey-David chene re men: Noo syemper rwii noo zu Dëdyuzh lo noo; wii noo zu Ne koo noo ladbëë; por neguin bet gundet gan lo noo.

²⁶Por neguin kesentyent rzhiilen lextoo noo no rzhiilen noo rolbaan noo, zet noo, per tebli nuu lextoo noo, porke che nan noo ne sban noo,

²⁷porke ydeedet de si gyan noo lenbaa no ydeedet de si xiin xkwerp XPee de ne bet dol rlaadet.

²⁸Laa de wlaa ne waknan noo nëz ne gak ydxiin noo lo Dëdyuzh ledne gap noo gyelembán. Kesentyent yzhiilen noo ne kwii noo de.

²⁹’Men-Israel, yzëët noo logne nli lo de: David ne nak xpenkwlal be, wet men, wgugyeer mén men, no benak nex xbaa men nee axtegue naaree.

³⁰Te profet wak men no wkanzaleedx men ne re Dëdyuzh lo men ne lad xfamilye men yruu Crist ne sob ynebééy.

³¹Axtegue antes che nan men neree; por neguin re men ne sban Crist no ne gyandet Ne lenbaa, ni xiindet xkwerp Ne.

³²Naaree naa le Dëdyuzh che wneban Jesus guin; no wii noo yra noo ne nli wban Ne.

³³Sya Ne gyeybaa koo Dëdyuzh ladbëë no wkakwent Ne Espíritu Sant ne che re Dëdyuzh; orrenaa le Ne che wxaal Espíritu Sant lo noo yra noo; laa we nee nak ne kawii de yra de no ne kayon de.

³⁴Porke let Davidet wyeep gyeybaa, porke David ke re: Dëdyuzh re lo XDëdyuzh noo: “Gusob koo noo ladbëë

³⁵axtegue ne ylaa noo ne gyichnii de yrandxee mén ne rlaa lo de.”

³⁶’Yrandxee de ne nak de men-Israel, gugaknanwen ne Jesus ke ne wkaa de lo kruz, Dëdyuzh wlaa ne laa Ne rnebééy no wlaa Dëdyuzh Ne Crist.

³⁷Chene won yra mén ne ndxin nga diizree, wdenles lextoo men. Orguin wnabdiiz men lo Bëd no le lo stebëd poxter, re men: ―¿Pagox nak ne ylaa noo?

³⁸Wke Bëd, re Bëd: ―Gusaan xgyelmal de no gurobnis te te de por la Jesucrist, chen gun Dëdyuzh perdon xdol de no chen yseleedx Ne Espíritu Sant lo de yra de.

³⁹Porke diiz guin ne re Dëdyuzh, por laa de yra de nako no le por yra zhiin de no le por yrandxee mén ne nuu nat no le por yrandxee mén ne rlaantee Dëdyuzh kwëz Ne.

⁴⁰Yra diizree wnii Bëd lo men yra men no ndalre diiz ne wnino Bëd men, re Bëd: ―¡Guruu lad menmal ne nuu naaree!

⁴¹Yra mén ne wlaleedx diiz ne wzëët Bëd, wrobnis men. No dxe ke guin wdee zeg stsonmil mén lad men ne rlaleedx Jesucrist.

⁴²Kesentyent nulyaaz men yra ne rneluu poxter lo men, tebegue nak men yra men no ra men ru men gyëtxtil tese yra men zegne wkyeen Jesus no rnab men lo Dëdyuzh.

⁴³Kesentyent rzee rzak yrandxee mén por yra gyelmilaguer no le por yra gyelenzoon ne rlaa poxter.

⁴⁴Yrandxee mén ne wlaleedx Jesucrist, tebegue wak men yra men no runelsaa xyudar xkompanyer men kon logne rapendxee men.

⁴⁵Rtoo men xelyu men no rtoo men logne rapendxee men, lex rgyiiz men med lo xkompanyer men segun lyaaz ne rzak men te te men.