Tjakultjurinkunytja 3:12-26

¹²Yaṉangu tjuṯa tjungurrinytja nyakula Piitalu tjananya watjaṉu, “Yitjurilaku walytja ngaṉṯitja tjuṯa, kulilaṉiya! Nyurrangarri ngalinyatju nyakula wiyawanangku kuliṉi yalatji, ‘Pala kutjarra ngangkari tiṉatjarrangku wati palunya palyaṉu. Tjukarurrupula Katutjaku nyinanyi.’ Wiyanyurra yalatji kulintjaku. Yiitjukuṉu ngangkari tiṉatjarrangkulitju palyaṉu.

¹³Nganampa walytja yurruntitja tjuṯa nyinangi, Yipuramanya, Yatjikanya, Tjikupanya. Palumpa tjanampa Katutjanya mayutju nyinapayi. Yiitjukuṯarra Katutjanya mayutju nyinangu. Paluru Katutjaku waarrkana tjukarurru nyinanytjala, Katutjalu Yiitjunya mayutju tiṉa nyinatjunu. Yiitju palunya nyurrangarri mayutju tjuṯangka kurungka watjaṉu tjana witira katirra iluntankunytjaku. Mayutju Payilatalu Yiitjunya pakaltjingalkitjangku yunytjurringutjangka, nyurrangarri wiya watjaṉu.

¹⁴“Yiitju paluru ilta Katutjaku tjukarurru nyinapayi, kuya palyantjawiya. Nyurrangarri yaṉangu kutjupaku mirri pungkupayiku yunytjurringkula watjaṉu, Yiitjunya wiya pakaltjingantjaku.

¹⁵Yalatji watjaranyurra Yiitjuku puntura tuunlayikirringu, ‘Palya tjana Yiitjunya iluntankunytjaku.’ Yalatjinyurra yaṉangu kanalpayinya kulilwiyangku watjaṉu iluntankunytjaku. Katutjalu palunya mirringuru kanara pakaltjingaṉu. Paluru kanarrinytja kurungku nyakulalatju nyurrangarrinya tjakultjunanyi.

¹⁶Wati ngaatjanya nyumputjanu palyarringutjangku Yiitjunya Katutjakuṉu kuliṉi. Yalatji kulira ngaatja wati paluru palyarringulpi, yaṉangu tjuṯangka kurungka.”

¹⁷Piitalu tjananya piyuku nintiṉu, “Ngayuku walytja tjuṯa, kulilaṉiya! Ngayulu nintingku kuliṉi, nyurrangarri, mayutju tjuṯangkuṯarra ramarringkula watjaṉu tjana Yiitjunya yiluntankunytjaku.

¹⁸Yirriṯi, Katutjaku wangka watjalpayi tjuṯangku watjaṉangi, ‘Yaṉangu tjuṯangku Kurayitjanya panypurangkula pungku.’ Wangka yalatji watjaṉutja yiltarringu, Katutjalu kulintjawana.

¹⁹Nyurrangarri kutu kuya palyantjawiya tjukarurrulpi Katutjaku nyinanytjaku. Yalatjinyurra Katutjaku wangka kulintjala Katutjalu nyurrangarrimpa kuya waṉiku.

²⁰Palulanguru paluru nyurrangarrinya kaṉṯilyanku tjukarurru nyinanytjaku. Ngula paluru nyurrangarrimpa Yiitjunya piyuku mantakutu ngalya wantirriyalku. Paluru yurrunpa watjaṉu, mayutju Kurayitjanya wantirriyalkitjangku, mayutju nyurrangarrimpa nyinanytjaku.

²¹Katutjaku ngurrangka Yiitjunya kutu nyinamalpa, palunyatjanu paluru piyuku ngalyanku mayutju tiṉalampa nyinanytjaku. Paluru mantakuturringkulalpi mayutju nyinanytjala yaṉangu tjuṯa palya nyinaku, ngurra tjuṯaṯarra palya ngaraku. Yalatji Katutjaku wangka watjalpayi tjuṯangku yurrunpa watjaṉu.

²²“Nganampa walytja yurrunpa nyinapayingku Muutjalu yirriṯi watjaṉu, ‘Ngayulu Katutjaku wangka watjalpayi nyinanyi. Ngayunya nguwanpa Katutjaku wangka watjalpayi kutjupa Katutjalu wantirriyara nyurrangarrimpa mayutju ngaratjunku. Paluru walytja nyurrangarrimpa nyinaku, wangka walytjatjarra. Palumpa wangkanyurra kulira tjukarurru nyinanytjaku.

²³Katutjaku wangka watjalpayi palunya yaṉangu tjuṯangku kulira wantinyingka, Katutjalu yaṉangu palunya tjuṯa warukutu waṉiku, wiya palumpa walytja paluru tjana nyinaku, wiya.’

²⁴“Katutjaku wangka watjalpayi yuwankarrangkuya, Tjamiyulaluṯarra watjaṉu, ‘Kurayitjanya yilta mayutju tiṉa nyinaku.’ Tjamiyula paluru wangka panyapa yurrunpa watjaṉu. Tjamiyulanya nyinanyingka ngaṉṯiya Katutjaku wangka watjalpayi kutjupa tjuṯangkuṯarra wangka palunya watjaṉu. Wangka tjanampaṉu iltarringu Yiitju Kurayitjanya paṉangkalpi nyinangi.

²⁵Katutjaku wangka watjalpayi palunya tjuṯaku nyurrangarri walytja ngaṉṯitja tjuṯa nyinanyi. Katutjalu nyurrangarrinyaṯarra wangka yalatji watjaṉu, ‘Yipuramala Katutjalu yalatji watjaṉu. Nyuntupa walytja ngaṉṯitja kutju ngula nyinanyingka, yaṉangu yuwankarraya yunyparriku, manta kutjupa kutjupa ngurrara tjuṯaṯarra.’”

²⁶Piitalu tjananya piyuku watjaṉu, “Palulanguru Katutjalu nyurrampa yurrun yurrunpangku palumpa katja wantirriyaṉu, nyurrangarri yunyparrinytjaku, nyurrangarri palumpa wangka kulira kuya palyalwiyalpi palumpa tjukarurru nyinanytjaku.”