Tingtoeng 145:1-15

¹David kah Koehnah Kai kah Pathen Manghai namah te kan pomsang saeh lamtah, kumhal duela na ming ni ka uem yoeyah eh.

²Khohnin takuem ah nang kang uem vetih na ming te kumhal duela thangthen yoeyah ni.

³BOEIPA tah len tih muep thangthen pai saeh. A lennah te khenah om pawh.

⁴Cadilcahma kah cadilcahma duela na bibi te a domyok sak vetih na thayung thamal te a thui uh ni.

⁵Na rhuepomnah, na thangpomnah, na mueithennah neh na ol khobaerhambae ni ka lolmang puei eh.

⁶Te dongah na tlungalnah rhih om te a thui uh vaengah na lennah phoeikah na lennah te ka tae eh.

⁷Na thennah muep poekkoepnah te a phuet uh vetih, na duengnah te a tamhoe puei uh ni.

⁸Lungvatnah neh thinphoei BOEIPA tah a thintoek a ueh dongah a sitlohnah khaw len.

⁹BOEIPA tah a cungkuem taengah then tih a haidamnah khaw a khoboe boeih soah tueng.

¹⁰Na bibi boeih loh BOEIPA namah n'uem uh vetih na hlangcim rhoek loh namah n'koeh uh ni.

¹¹Na ram kah thangpomnah a ti uh vetih na thayung thamal te a thui uh ni.

¹²A thayung thamal neh a ram rhuepomnah dongkah thangpomnah hlang koca rhoek taengah ming sak ham ni.

¹³Na ram khaw kumhal boeih kah ram la om tih ni na khohung khaw cadilcahma phoeikah cadilcahma boeih duela cak.

¹⁴Aka cungku boeih te BOEIPA loh a talong tih aka duengyai boeih te a sambai.

¹⁵Mik boeih loh namah te n'lamso uh tih amah tue vaengah a caak te amih taengah na paek.