ZABURA 145:1-15

¹Dikiri táaki kũ Dauda lɛ̀ɛ. Mani n táaki lɛ́, ma Luda ma Kína, manigↄ̃ n tↄ́ bo gↄrↄ sĩnda pínki.

²Manigↄ̃ n sáabu kpá lákũ gu dìgↄ̃ dↄ nà, manigↄ̃ n táaki lɛ́ lakanaa sari.

³Dikiri zↄ̃kↄ̃, à kà ò a táaki lɛ́, a zↄ̃kↄ̃kɛ lɛ́ vĩro.

⁴Kpàinↄ ni n yãkɛnanↄ sáabu kpá Wurenↄnɛ, oni n yãzↄ̃kↄ̃kɛnanↄ kpàkpa kɛ.

⁵Oni n manakɛ zↄ̃kↄ̃ gakuride yã o, mani n yãbonsarɛkɛnanↄ laasun lɛ́.

⁶Oni n yãkɛna naasi gbãna yã o, mani n zↄ̃kↄ̃kɛ gadi kɛńnɛ.

⁷Oni n manakɛ zↄ̃kↄ̃ baaru kpá, oni ayuwii kɛ n yãzɛdekɛnanↄ yãi.

⁸Dikiri sùru vĩ kũ wɛ̃ndao, àdi pↄ fɛ̃ likaro, à gbɛ̃kɛ vĩ zↄ̃kↄ̃.

⁹Dikiri dì yã mana kɛ gbɛ̃ sĩnda pínkinɛ, àdi a pↄ́ kũ à kɛ̀nↄ wɛ̃nda gwa ń pínki.

¹⁰Pↄ́ kũ n kɛ̀nↄ ni n sáabu kpá ń pínki, n yãmarinↄ ni n tↄ́ sɛ́ lei, Dikiri.

¹¹Oni n kpata gakuri gadi kɛ, oni n iko gbãna yã o,

¹²de gbɛ̃ sĩnda pínki n yãzↄ̃kↄ̃kɛnanↄ dↄ̃ kũ n kpata mana gakuride yão.

¹³N kpata bi kpata lakanasarimɛ, ĩnigↄ̃ de kína ũ ari ó buria. Dikirin náani vĩ yã kũ à ò musu pínki, à sùru vĩ kũ pↄ́ kũ à kɛ̀nↄ ń pínki.

¹⁴Dikiri dì gbɛ̃ kũ òtɛn lɛ́tɛnↄ kũ, àdi gbɛ̃ kũ wari tↄ̃̀ḿmanↄ futɛ.

¹⁵Pↄ́ sĩnda pínki wɛ́ dↄnyĩ, ndì pↄ́ble kpáḿma a gↄrↄa.