SALAMO 145:1-15

¹Egu Dirava bona egu Pavapava, oi baina imodaimu, bona oi ladamu baina hanamoa ela bona hanaihanai.

²Dina iboudiai baina hanamomu, bona ladamu baina imodaia ela bona hanaihanai.

³Iehova na bada, ia iheatolaina danu baine bada; ena herea-dae na asi itahuna dalana.

⁴Uru ta ese uru ta enai emu ḡaukara baine hanamolaia, bona emu siahu karadia baine gwaurai hedinarai.

⁵Emu lohia toadia hairaidia bona emu hoa karadia baina haerodia.

⁶Emu kara siahudia mai garidia na taunimanima ese bae gwauraidia; emu herea-dae baina gwauraia hedinarai.

⁷Emu harihari-bada haridia bae hapiu, bona emu kara maoromaoro na bae anelai lalo-dika.

⁸Iehova na mai ena harihari-bada bona mai ena hebogahisi; ena badu e halahemu, ena hebogahisi na bada herea.

⁹Iehova ese taunimanima iboudiai e kara namo henidiamu, vada e kara ḡaudia iboudiai na ia ese e bogadia hisimu.

¹⁰Iehova e, o kara ḡaudia iboudiai ese bae hanamomu, bona emu helaḡa taudia ese bae imodaimu.

¹¹Emu basileia hairaina bae herevalaia, bona emu siahu bae gwauraia;

¹²emu siahu karadia na taunimanima natudia bae hadibalaidia, bona emu basileia hairaina ḡoeva-daena danu.

¹³Emu basileia na mia-hanaihanai basileiana, emu lohia na e hesiriumu uru iboudiai lalodiai. Iehova na mai ena heabidadama, ena hereva iboudiai lalodiai, bona mai ena harihari-bada, ena kara iboudiai lalodiai.

¹⁴Iehova ese e ketomu taudia iboudiai na e abidia isimu; e nunumaidia tarimu taudia iboudiai na ia ese e veridia toremu.

¹⁵Mata iboudiai ese oi e haḡeremumu; oi ese adia o henidiamu, ta ta ena nega ena nega ai.