Taha Bapare Sâcmutâc 8:8-25

⁸Iŋuc erâ qâ amecnao qonaŋkecnerâ amecnao dâŋ mumutarare ma jajahec Urim â Tumim i hâcne râecnewec.

⁹Erâ Wofuŋzi Mose mutâcnecnewec irec sâcko qizecnao du kakambuc moc hecneme huwec â masapu golzi bakicne, eri hendiŋ tirine hâcne, i ira bohotacneme mamai fowec.

¹⁰Eme Mose e rurua wokemaŋ opâ rorâ tiri boze â maŋnao wiac fofârewec i ruacnehuc bâtiriwec.

¹¹Erâ wokemaŋ gâcne alatao tieme arec 7 ewec. Ehuc alata â giere wiac‐ticne sasawa erâ opâ pake sâko ŋeŋenehec i bâtirieocte wokemaŋ ruacnewec wâc.

¹²Wokemaŋ gâcne ine Aroŋ mufirieocte qizecnao hoŋkehuc ruacnewec.

¹³Mose e iŋuc erâ Wofuŋzi mutâcnecnewec irec sâc ehuc Aroŋ ŋokâfâcne ejareme warepie ŋaqi hejareme hume umbika joma‐jarerâ du hejareme huwec.

¹⁴I tarame sâqocne tâtâmire tahare bulimakao ŋicne mume bafisipie Aroŋ â ŋokâfâcne jaŋe mejeŋiczi qizecne basanaŋkembiŋ.

¹⁵Iŋuc ehuc bânduŋkepie Mosezi qâhâmowec. Ehuc socticne rorâ meticnezi alata ʒuŋene râreckehuc ruacnewec, iŋuc ehuc ʒure ɋaɋackewec. Soc gâcne ine alata fuŋnao hoŋkewec. E alatare due baocte iŋuc ehuc bâtiriwec.

¹⁶Iŋuc erâ Mose e wokemaŋ qârurune â bugâpâcnao qârurune fokac erâ râpe hândâŋ jahecnao wokemaŋzi bohotara fokac i rorâ alatao râeme ʒawec.

¹⁷Bulimakao fârine â sahacne â biucne erâ hone i ine Wofuŋzi Mose mutâcnecnewec irec sâcko hae râpenao ʒocko râeme ʒafârewec.

¹⁸Eme Mosezi mume qowi bâzi ririkere lama ŋicne bafisipie Aroŋ â ŋokâfâcne jaŋe qizecne bânduŋkembiŋ.

¹⁹Ehame Mose e qâhâmorâ socticne alata râreckehuc tie rawec.

²⁰Izi lama ŋicne hezupie tarame Mosezi qizecne â dâkâne dâkâne erâ wokemaŋne râeme ʒawec.

²¹Erâ hobune â kikene opâzi ʒureme tarame wiac i sasawa iŋuc jaha alatao rome ferâ ʒawec. I Wofuŋzi Mose mutâcnecnewec irec sâcko hâcne qowi bâzi râeme ʒahuc Wofuŋte maio âsu biaŋ fuawec.

²²Eme Mose e lama ŋicne moc, mumufiriere lama hâcne, i mume bafisipie Aroŋ â ŋokâfâcne jaŋe mejeŋiczi qizecne bânduŋkembiŋ.

²³Ehame Mosezi qâhâmorâ soc gâcne rorâ Aroŋ hazecɋoŋ‐ticne fâreopec â meneŋgoc‐ticne fâreopec erâ kike neŋgoc‐ticne fâreopec jaha ruacnewec.

²⁴I tarame Aroŋ ŋokâfâcne jowac‐jopa warepie Mosezi hazecɋoŋ‐jeŋic fâreopec â meneŋgoc‐jeŋic fâreopec â kike neŋgoc‐jeŋic fâreopec jaha i soc rua‐jarewec; soc gâcne ine alata râreckehuc tie rawec.

²⁵Iŋuc erâ wiac kecʒiŋuc rofârewec: Wokemaŋ â gecne wokemaŋhec â honao wokemaŋ bohotarâ fowec â bugâpâcnao qârurune fowec â râpe hândâŋ jajahec â ira wokemaŋzi bohotara fowec erâ ŋefacne fâreopec.