Taha Bapare Sâcmutâc 6:2-30

²“Ŋic moc e ŋic âgo‐ticnere wiac hone soŋaŋ eocte râcnekicne i mickecnehuc bajuocmu me wiac moc fiuc roocmu, me ŋic âgo‐ticne bâʒâickehuc wiac jâoc roocmu e Wofuŋ râpeckerâ kiŋ bâfuaocmu.

³Me wiac sifuckekicne i bâfuarâ mumupaŋ dâŋ burecne muhuc mickeocmu ine kiŋ jaha bâfuaocmu.

⁴Ine ŋiczi wiac i me i ebac ehuc sâqocne bâfuaeŋgopieŋ i ehuc kiŋ hotâckeocmu jaha. Irec wiac fiuc roocmu me ŋic jopa sipiric ehuc roocmu me wiac hone soŋaŋ eocte râcnepie bâsifuckeocmu me wiac sifuckekicne bâfuaocmu,

⁵me wiac irec me irec mumupaŋ dâŋ burecne muhuc sakareocmu i furu jaha bârisie‐fârezejec. Erâ i sawa mâcne, e wiac i sasawa irec 5‐konec wâŋ ʒuhuckerâ kiŋ tatara taha râeocmu dameŋ ira rune râcne‐fârezejec.

⁶Erâ goki mucmu irec sâc lamafâc‐ticne jaŋeraonec ŋicne biaŋne moc Wofuŋte biŋe qahuc kiŋ tatara tahare biŋe taha baparao bafisizejec.

⁷Eme taha bapa e Wofuŋte maio kiwiric jâoc rome ŋic e wiac i me i ebac ehuc kiŋ bâfuawec irec bâbâtâmire fuacnezejec.”

⁸Wofuŋzi Mose dâŋ kecʒiŋuc âzâcnewec:

⁹“Go Aroŋ â ŋokâfâcne ʒiŋuc mutâcne‐jarezemec: Qowi bâzi ririkere sâcmutâc kecʒiŋuc fokac: Qowi bâzi i alata faio ʒafeo jaha ʒahuc foha hae furezejec, ehame alatao ʒoc ʒakac i bâruŋkehuc fozejec.

¹⁰Eme taha bapa e gie ŋaqi â hohose‐ticne heme hume qowi bâzi alatao ʒakume ʒafe fuawec i rorâ alata heririŋnao hesiezejec.

¹¹Iŋuc erâ gie ŋaqi wiac‐ticne mocwâc heunuckerâ ŋaqi omane herâ ʒafe wiac hae râpenao ʒafe hohoŋke mâreŋ biaŋne fokac ira barazejec.

¹²Alata faio ʒoc i mi hâhâpo ʒahuc jaha fozejec, ehame taha bapa e furic sâc ʒoc tucne râerâ fainao qowi bâzi qandaŋkehuc ine wama bâzire wokemaŋ rikezejec.

¹³Ehame alata faio ʒoc i mi hâhâpo ʒahuc jaha fozejec.

¹⁴“Taha bâzi ririkere sâcmutâc kecʒiŋuc fokac: Aroŋ ŋokâfâcne jaŋe Wofuŋte maio alata fuŋko taha bâzi râenʒepieŋ.

¹⁵Ehame moczi taha bâzire poroŋ uucne wokemaŋnehec me fufusuc moc, â wiac âsu biaŋhec fainao râekicne i sasawa rorâ alata faio rike siŋsiŋkeme Wofuŋte maio âsu biaŋ fuazejec.

¹⁶Tiwâne ine Aroŋ â ŋokâfâcne jaŋe nânʒepieŋ, jaŋe wiac i goreŋ tâmiric tutumaŋ qoruc bozere tiri hae ʒoŋao nânʒepieŋ hâcne.

¹⁷Tiwâ bâzi i goreŋ tâmiric mâc rikenʒepieŋ. Nore biŋe tiwâ bâzi rikekicne irec dâkâne moc qikiŋne‐jarepo hâcne, i sâqocne tâtâmire â kiŋ tatarare taha irec sâc taha tiri jâmbâŋ ekac.

¹⁸Aroŋ ɋâricfâcne jaŋe sasawa Wofuŋte tiwâ bâzire dâkâne sâcne nâniŋmu irec sâcmutâc i mimiŋzi ɋâric foŋare rahuc juzejec. Ehame ŋic izi me izi wiac i ba bâuac ejarerâ tirine eocmu.”

¹⁹Wofuŋzi Mose ʒiŋuc âzâcnewec:

²⁰“Aroŋ ŋokâfâcne jaŋeraonec moc wokemaŋ ruacneniŋmu dameŋ ira Aroŋ â ŋokâfâcne jaŋe taha bâzi kecʒiŋuc râenʒepieŋ: Poroŋ uucne amae 10‐konec wâŋ iŋuc râenʒepieŋ, ehuc gâcne furictere â gâcne ŋafere biŋe râenʒepieŋ.

²¹Jaŋe wokemaŋhec bâsifuckerâ ʒocrâqâcko rikenʒepieŋ; eme rike hâmokicne i bazutec dâkâ piic piic eme taha bâzi iŋucne bafisirâ rike siŋsiŋketec Wofuŋte maio âsu biaŋ fuazejec.

²²Ehame Aroŋ ŋokâfâcne jaŋeraonec moc mamac‐ticne âkehockeocte wokemaŋ ruacnekicne e wâc iŋuc jaha taha bâzi Wofuŋte biŋe râehuc juzejec. Ʒi Wofuŋte mumupaŋ fofo sanaŋ. Taha i ine furu jaha rikenʒepieŋ.

²³Taha bapazi taha bâzi rikeocmu i moc mi nâhuc furu jaha râepie ʒafârezejec.”

²⁴Wofuŋzi Mose ʒiŋuc âzâcnewec:

²⁵“Go Aroŋ â ŋokâfâcne kecʒiŋuc jazazemec: Sâqocne tâtâmirere sâcmutâc i kecʒiŋuc: Qowi bâzi qâhâmoeŋgopieŋ hae ijaha sâqocne tâtâmire qowi Wofuŋte maio qâhâmonʒepieŋ, i wiac tirine jâmbâŋ.

²⁶Taha bapa sâqocne tâtâmire bâzi rikeocmu eki nâzejec; ine tutumaŋ qoruc bozere tiri hae ʒoŋao nâzejec.

²⁷Ŋic omane moczi ba bâuac eocmu e ine okacne fuacneocmu, me socticnezi ŋaqi moc ruacneme ŋaqi i tirific maŋko ʒurenʒepieŋ.

²⁸Â qowi biucne ʒaekac hapec i qanʒaŋnenʒepieŋ, me aeŋ kuʒio ʒaocmuo ine kuʒi i ʒure bâkereŋ enʒepieŋ.

²⁹Taha bapa ŋic jaŋe sâqocne tâtâmire taha irecnec nâzo murâ sâcne nâniŋmu, taha i wiac tirine jâmbâŋ hâcne.

³⁰Mâc sâqocne tâtâmire qowi mocte soc tutumaŋ qoruc bozere maŋko kiwiric rorore manasuhuc tirificko bafembiŋko ine qowi i moc mi nânʒepieŋ, aricne, i ʒocko râepie ʒafârezejec.