Taha Bapare Sâcmutâc 5:4-11

⁴Me ŋic moczi wiac biaŋne me sâqocne ebac eocte mi mana tarahuc acmâc jaha mupaŋkeocmu mecne, ʒâhec ine fuŋne‐ticne mana tararâ kiŋhec ekopac muocmu.

⁵Ŋic moc e wiac i me i ehuc kiŋ bâfuaocmuo ine sâqocne bâfuawec i mufuazejec.

⁶Ehuc sâqocne bâfuawec irec kiŋ tatarare bâzi Wofuŋtao râezejec. Lama me noniŋ ŋokacne moc sâqocne tâtâmire taha râezejec hâcne. Eme taha bapazi sâqocne‐ticnere erâ kiwiric‐ticne rozejec.

⁷“Me lama moc mi focnekacko ine sâqocne bâfuawec irec kiŋ tatara tahare biŋe hapâ jajahec me buni jajahec Wofuŋtao râec‐jofazejec. Moc i sâqocne tâtâmire tahare biŋe ehame moc i qowi bâzire biŋe ezejec.

⁸E wiac i taha baparao râezejec. Eme eki hapâ moc i sâqocne tâtâmire tahare biŋe râezejec, ehuc upene mâc ʒâkiriŋkerâ mi hetâcnezejec.

⁹Erâ soc gâcne rorâ alata tambaraŋnao tiehuc nâfocne ine alata fuŋnao hesiezejec. Iŋuc eme sâqocne tâtâmire taha eocmu hâcne.

¹⁰I tarame hapâ moc mumutâc dâŋte sâcko qowi bâzire biŋe râezejec. Taha bapa e ŋic sâqocne bâfuawec ere kiwiric rome sâqocne bâbâtâmire fuacnezejec.

¹¹“Me ŋic hapâ jajahec me buni jajahec moc mi jucnepie ine sâqocne bâfuawec irec sâqocne tâtâmire tahare biŋe poroŋ uucne amae 10‐konec wâŋ râezejec. Sâqocne tâtâmire taha ekacte wokemaŋ opâne me wiac âsu biaŋhec moc mi ʒuhuckezejec.