Taha Bapare Sâcmutâc 4:9-35

⁹Ehuc râpe hândâŋ jajahecko wokemaŋzi bohotarâ fokac, erâ bugâpâcko qârurune fokac i mâmâc bârâriezejec,

¹⁰(wama bâzire biŋe bulimakao taha bahuc wiac ecnekicne sâc ijaha ecnezo). Ehuc taha bapa e wiac i taha bâzi ririkere alata faio rikezejec.

¹¹Bulimakao sahacne â biucne â qizecne â kikene erâ hone

¹²i sasawa hae râpenao ʒafe hohoŋke mâreŋ biaŋnao bararâ ʒocko rikenʒepieŋ.

¹³“Me Israe kikefuŋ ʒeŋgoma jaŋe Wofuŋzi wiac ebac ezore sâcmutâc râewec i mi mana tarahuc huckerâ tutumaŋko hesoŋkehuc kiŋhec eniŋmu.

¹⁴Eme sâqocne bâfuakicne i fua taniŋkeme kikefuŋzi bulimakao ŋicnezi motecne moc rorâ sâqocne tâtâmirere biŋe taha baniŋte tutumaŋ qoruc bozeo bafisinʒepieŋ.

¹⁵Ehame soŋaŋ micne jaŋe Wofuŋte maio mejeŋiczi bulimakao qizecne bânduŋkerâ qâhâmonʒepieŋ.

¹⁶I tarame taha bapa wokemaŋ ruacnekicne eki bulimakao soc gâcne rorâ tutumaŋ qoruc bozeo bafezejec.

¹⁷Erâ memotec‐ticne socko âke uruckerâ Wofuŋte maio ââketâc fuŋnao tieme arecne 7 ezejec.

¹⁸Izi soc gâcne rorâ tutumaŋ qoruc bozere maŋko alata Wofuŋte maio ŋekac irec ʒuŋene ruacnezejec; soc tiwâne ine tutumaŋ qoruc bozere motâcko qowi bâzi ririke alata ŋekac irec fuŋnao hoŋkezejec.

¹⁹Ehuc wokemaŋ‐ticne sasawa alata faio rikezejec.

²⁰Sâqocne tâtâmirere biŋe mârâc bulimakao wiac ecnekicne sâc ijaha bulimakao ʒi ecnezejec. Taha bapa e iŋuc ehuc kiwiric‐jeŋic rome sâqocne bâbâtâmire fua‐jarezejec.

²¹Eme bulimakao hae râpenao bahurâ mârâc moc rikewec iŋuc jaha rikezejec. I kikefuŋte sâqocne tâmireocte wiac iŋuc hâcne fuazejec.

²²“Me ŋic fekicne moc e Wofuŋ Anutu‐ticnezi wiac ebac ezore sâcmutâc râewec i mi mana tarahuc huckerâ kiŋ bâfuaocmuo,

²³me sâqocne bâfuawec i mutaniŋkecneniŋmuo ine taha baocte noniŋ ŋicne biaŋne moc râezejec.

²⁴Ehuc meticnezi noniŋ qizecne bânduŋkerâ taha bâzire qowi qâhâmoeŋgopieŋ ijaha Wofuŋte maio qâhâmozejec. E iŋuc eme sâqocne tâtâmire taha eocmu.

²⁵Eme taha bapa e sâqocne tâtâmire taha irec soc gâcne rorâ memotec‐ticnezi qowi bâzi ririkere alata ʒuŋene ruacnezejec; soc tiwâne ine alata irec fuŋnao hoŋkezejec.

²⁶Wokemaŋne sasawa ine alata faio wama bâzire wokemaŋ rikewec irec sâc jaha rikezejec. Taha bapa e iŋuc ehuc ŋic sâqocne ere kiwiric rome sâqocne bâbâtâmire fuacneocmu.

²⁷“Me ŋic ŋokac omane jaŋeraonec moc e Wofuŋzi wiac ebac ezore sâcmutâc râewec i mi mana tarahuc huckerâ kiŋ bâfuaocmuo,

²⁸me sâqocne bâfuawec i mutaniŋkecneniŋmuo ine taha baocte noniŋ ŋokacne biaŋne moc râezejec.

²⁹Ehuc meticnezi noniŋ qizecne bânduŋkerâ noniŋ i taha bâzire qowi qaeŋgopieŋ ira okacne qâhâmozejec.

³⁰Eme taha bapa e meticnezi soc gâcne rorâ qowi bâzi ririkere alata ʒuŋene ruacnezejec; soc tiwâne ine alata fuŋ nao hoŋkezejec.

³¹Ehuc wama bâzire wokemaŋ bârârieeŋgopieŋ irec sâc jaha wokemaŋ‐ticne sasawa bârâriezejec. Erâ alata fâio rike siŋsiŋkeme Wofuŋte maio âsu biaŋ fuazejec. Taha bapazi iŋuc ehuc ŋic ere kiwiric rome sâqocne bâbâtâmire fuacnezejec.

³²“Me ŋic ekizia sâqocne tâtâmire taha baocte lama moc râeocmuo ine ŋokacne biaŋne moc râezejec.

³³Ehuc meticnezi lama qizecne bânduŋkerâ bâzire qowi qâhâmoeŋgopieŋ ijaha sâqocne tâtâmirere qowi qâhâmozejec.

³⁴Eme taha bapa e sâqocne tâtâmire irec soc gâcne rorâ memotec‐ticnezi qowi bâzi ririkere alata ʒuŋene ruacnezejec; soc tiwâne ine alata fuŋnao hoŋkezejec.

³⁵Wokemaŋ‐ticne sasawa i wama bâzire lama irec wokemaŋ bârârieeŋgopieŋ irec sâc jaha bârârierâ alatao Wofuŋte taha bâzi gâcne ʒahuc fokac irec fainao râeme ʒazejec. Taha bapa e iŋuc ehuc ŋic sâqocne bâfuawec ere kiwiric rome sâqocne bâbâtâmire fuacnezejec.