Taha Bapare Sâcmutâc 26:7-24

⁷Eme ŋoŋe râsifâc‐ŋeŋic jopa jâpec ejarepie jaŋe ʒikare micko fenʒepieŋ.

⁸Ŋoŋeraonec ŋic 5 jaŋe ŋic 100 jâpec‐jopahapie 100 jaŋe teŋ tauseŋ jâpec‐jopanʒepieŋ; ehame râsifâc‐ŋeŋic jaŋe ʒâŋe fai‐ŋeŋicko ʒikare micko feniŋmu.

⁹Eme no ehâmo‐ŋarehuc sâoc‐ŋopahape sawe mâririackenʒepieŋ, ehame ŋoŋehec ʒâʒâfic epo i basanaŋkepemu.

¹⁰Ŋoŋe nânâ rowaŋ raŋɋanaonec nâhuc junʒepieŋ, ehame nânâ ɋâricnere dameŋ maickeme raŋɋane bârâriepie ɋâricnere ŋeŋe fuazejec.

¹¹Eme no ŋondeŋ‐ŋeŋicko ŋeŋe juju epemu, ehame maŋ qâqâtâc‐nanezi mi suŋgiŋ‐ŋopazejec.

¹²Ehame no ŋondeŋ‐ŋeŋicko rac warec ehuc Anutu‐ŋeŋic juhape ŋoŋe ŋicfâc‐nane erâ junʒepieŋ.

¹³No Wofuŋ Anutu‐ŋeŋic jukopac, noni hâcne Aigita ŋic jaŋere kiŋaŋ qaqa ʒuhuckerâ junʒipiŋte mâreŋ‐jeŋickonec jowac‐ŋopa wefupo; ŋoŋe rambaŋ juniŋte upe‐ŋeŋicko kioŋte babasanaŋ bazupo.

¹⁴“Me ŋoŋe dâŋnane manahuc sâcmutâc dâŋ sasawa ʒi mana rereŋ mi eniŋmuo

¹⁵me dâŋsanaŋ‐nane qâsuahuc mumutâc dâŋnane qaisockerâ mumutâc dâŋ sasawa mana rereŋ mi ehuc ʒâʒâfic‐nane hetâcneniŋmuo

¹⁶ine wiac ʒiŋuc eŋarepemu: No mupe wiac hâhâwicnezi ututuŋ fua‐ŋareocmu, ehame hucsanaŋ â huc ʒocnehec fua‐ŋareme ʒâŋe ʒoʒora â sahac wawaha eniŋmu. Iŋuc ehuc nânâ wiac he sarac eipiehapie fârine fuame râsifâc‐ŋeŋic jaŋe nâ bac eniŋmu.

¹⁷No râsi eŋarehape râsifâc‐ŋeŋic jaŋe jâpec‐ŋopanʒepieŋ, â qaisoc‐ŋopaeŋgopieŋ jaŋe bomboŋ eŋarenʒepieŋ, ehame moczi moc ŋopa jâpec mi eŋareha wisenʒepieŋ.

¹⁸Iŋuc fua‐ŋareme sifu dâŋnane mana rereŋ mi eniŋmuo ine sâqocne‐ŋeŋicte erâ bâtiŋ‐ŋopape arec 7 ezejec.

¹⁹Ehame no pepec penaroŋ‐ŋeŋic bawahahuc sawa qânikiŋ mupe aeŋ iŋucne erâ sanaŋkerâ fozejec â mâreŋ‐ŋeŋic i aeŋ bâbâroŋ iŋucne erâ fozejec.

²⁰Iŋuc fuame ŋoŋe tâpiri‐ŋeŋic mâc qâmienʒepieŋ, erâ mâreŋ‐ŋeŋiczi nânâ wiac gume hesiwiŋ mi ezejec â gieo jâc wiac doma rakac izi hândâŋ fârihec mi ezejec.

²¹“Ŋoŋe dâŋnane qatarahuc micnane mi reŋkeniŋmuo ine mupe wiac hâhâwicne mocwâc fua‐ŋareocmu, sâqocne‐ŋeŋicte erâ mupe wiac hâhâwicne arec 7 fua‐ŋarezejec.

²²Erâ no qowi mimicne ejarepe ŋondeŋ‐ŋeŋicko fuarâ naru motecfâc‐ŋeŋic kisuc qâsuc‐jopahuc bulimakaofâc‐ŋeŋic wâc sipiric‐jopapie ʒare‐jeŋic wahazejec; iŋuc eŋarepie hae mâreŋ‐ŋeŋic niniŋ siarereŋ fuarâ fozejec.

²³“Bâbâtiŋ iŋuc fua‐ŋareme sifu norao risiehuc dâŋnane mi mananiŋmuo

²⁴ine noni iŋuc jaha dâŋŋeŋic mi manahuc sâqocne‐ŋeŋicte erâ bâtiŋ‐ŋopape arec 7 eocmu.