Taha Bapare Sâcmutâc 25:41-53

⁴¹Hombaŋ ira ine naru motecfâc‐ticne jaŋehec behec‐ŋoparâ wiacfâc‐ticne jaŋerao risiezejec, ehuc mamac ŋosafâc‐ticne jaŋere mâreŋ rauckezejec.

⁴²Jaŋe nore kiŋaŋŋicfâc, noni hâcne Aigita mâreŋkonec jowac‐jopa wefupo, jaŋe moneŋte erâ kiŋaŋ qaqa mi bacjopazo.

⁴³Ŋoŋe Anutu‐ŋeŋic araŋ bacnehuc ŋic iŋucne ŋicbomboŋ ejarehuc mi bâʒâic‐jopanʒepieŋ.

⁴⁴Ŋoŋe kiŋaŋ ŋic ŋokac rocjopazo murâ ine qâpuc ŋic gurune gurune rârec rârec juraŋgopieŋ jaŋeraonec furi bacjopanʒepieŋ.

⁴⁵Me ŋic jabane â wiacfâc‐jeŋic ŋondeŋ‐ŋeŋicko jueŋgopieŋ me mâreŋ‐ŋeŋicko fuambiŋ jaŋeraonec wâc furi bacjopazo murâ furi bacjopapie ŋoŋere biŋe enʒepieŋ.

⁴⁶Erâ juku hâmoc dameŋ‐ŋeŋic maickeme ŋic iŋucne jaŋe ŋokâfâc‐ŋeŋic jaŋerao râec‐jopazo murâ râec‐jopapie jaŋere kiŋaŋ qaqa erâ junʒepieŋ. Israe ŋic qomâfâc‐ŋeŋic jaŋe ine ŋicbomboŋ ejarehuc mi bâʒâic‐jopanʒepieŋ.

⁴⁷“Ŋic furune me jabane moc moneŋ mafa sâkoheczi ŋoŋehec juhame qomâ‐ŋeŋic moczi hapetac erâ ŋic jabane e jahacne me soctofa‐ticne moc ere kiŋaŋ qaqa erâ juocmuo

⁴⁸ine hahac ɋafâc‐ticne jaŋeraonec moczi furi‐ticne râezo murâ râeme rambaŋko juzejec.

⁴⁹Me wawa‐ticne me nafe‐ticne me soctofa‐ticne moczi furine bazo murâ bahuc rambaŋko râeme juzejec. Me e jahac moneŋ mafa sâkohec erâ sahac‐ticnere furi râehuc rambaŋko juzejec.

⁵⁰E jahacne â ŋic furi‐ticne râewec jahe kiŋaŋ gie fuŋkekicne jara irecnec fuŋkerâ wose rakupire ʒeri bubiaŋ hombaŋko tarazejec. Ehame dameŋ ŋondeŋ ira jara wezimuc foocmu, irec sâcko furi râezejec. Kiŋaŋ qaqa gie dameŋ‐ticnere manapire ine moneŋ gie bapa ŋic ere dameŋ iŋucne ezejec.

⁵¹Jara‐ticne bocjaha foocmuo ine irec sâc manasuhuc furi rowec irecnec sahac‐ticnere furi rorâ râezejec.

⁵²Me jara‐ticne afecne sawa fome ʒeri bubiaŋ hombaŋ sâko maickeocmuo ine jara irec manasuhuc moneŋ afecne sawa bârisiecneme tarame rambaŋko juzejec.

⁵³E ŋic furine bawec erao jara sâc moneŋ gie bapa ŋic iŋucne juzejec, ehame bomboŋ‐ticnezi bâʒâickeocte mi manacnenʒepieŋ.