Taha Bapare Sâcmutâc 23:20-35

²⁰Eme taha bapa eki nânâ bâbâsu poroŋ â lama mâmâc jaha Wofuŋte maio fenʒoŋkezejec. Jaŋe Wofuŋte maio bâtiric‐jopakicnezi taha bapare biŋe enʒepieŋ.

²¹Ŋoŋe ʒoaŋ ira hâcne ŋic ʒiŋuc jazanʒepieŋ: Ŋoŋe tiri tutumaŋ ehuc gie moc mi banʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.

²²“Ŋoŋe padi wiac qa roro ehuc, gie qaŋeŋnao doma rakac i mi rofârenʒepieŋ â kisecne doma raocmu i wâc mi unucke‐fârenʒepieŋ. Ŋoŋe wiac i ŋic hapetac â jabane jaŋere biŋe behepie fozejec. No Wofuŋ ŋoŋere Anutu hâcne.”

²³Wofuŋzi Mose kecʒiŋuc âzâcnewec:

²⁴“Go Israe ŋic ʒiŋuc jazazemec: Mosa 7 irec ʒoaŋ gie bapa wâŋ ira hombaŋ moc ŋenʒepieŋ, erâ sawaŋ qaqac ehuc qeŋ qanʒepieŋ, ehuc tirificko tumaŋnenʒepieŋ.

²⁵Ŋoŋe gie bapao gie baeŋgopieŋ irec sâc hombaŋ ira mi banʒepieŋ, ehuc Wofuŋ taha bâzi rikecnenʒepieŋ.”

²⁶Eme Wofuŋzi Mose kecʒiŋuc âzâcnewec:

²⁷“Mosa 7 irec ʒoaŋ gie bapa 10 izi kiwiric roro dameŋ ezejec. Ŋoŋe ira hâcne tirificko tumaŋnenʒepieŋ, erâ sowa juhuc Wofuŋ tiwâ bâzi rikecnenʒepieŋ.

²⁸Ŋoŋe ʒoaŋ ira gie moc mi bajâmbâŋkenʒepieŋ, ʒoaŋ i kiwiric roro dameŋ hâcne. Taha bapa jaŋe ʒoaŋ ira hâcne Wofuŋ Anutu‐ŋeŋic ere maio kiwiric‐ŋeŋic ronʒepieŋ.

²⁹Eme ŋic moc e ʒoaŋ ira sowa mi juocmu e ŋic âgofâc‐ticne jaŋere ŋondeŋkonec bâsirowezo.

³⁰Me moc e ʒoaŋ ira gie baocmu e ŋic âgofâc‐ticne jaŋere ŋondeŋkonec bâsirowepemu.

³¹Ŋoŋe ʒoaŋ ira gie moc mi bajâmbâŋkenʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.

³²Hombaŋ izi sabata hombaŋ fârine eha sowa junʒepieŋ. Ŋoŋe sabata‐ŋeŋic ʒoaŋ gie bapa 9 ira hae owâeme fuŋkerâ ŋehapie hae furerâ owâeme ŋetaranʒepieŋ.”

³³Eme Wofuŋzi Mose kecʒiŋuc âzâcnewec:

³⁴“Go Israe ŋic ʒiŋuc jazazemec: Mosa 7 irec ʒoaŋ gie bapa 15 ira fuŋkerâ Wofuŋte rehac boze hombaŋ ŋehuc juhapie ʒoaŋ gie bapa 7 tarazejec.

³⁵Ʒoaŋ bâbâni ira tirificko tutumaŋ ehuc gie moc mi banʒepieŋ.