Taha Bapare Sâcmutâc 14:33-52

³³Wofuŋzi Mose â Aroŋ ʒiŋuc jasawec:

³⁴“No Kanaaŋ mâreŋ i ŋoŋere biŋe eocte ŋare tahac epemu. Eme ŋoŋe ira fisirâ juhapie mupe fic hae‐ŋeŋic gukuckeme

³⁵fic runezi taha baparao rarâ ʒiŋuc âzâcnezejec: No honepe fic hae‐nane gukuckekac iŋuc tinac ekac.

³⁶Iŋuc âzâcneme taha bapazi ficmaŋko wiac sasawa fokac i ropie waha‐fâreocte jazazejec. Wiac i wâwânâŋhec efârekac muzacte iŋuc enʒepieŋ. Eme ropie waha‐fâreme taha bapazi ficmaŋko fezejec.

³⁷Ferâ fic gukuckewec i honezejec; ehame ficsâpe gukuckehuc qondaŋ qarâ gufewec,

³⁸taha bapazi iŋuc honerâ fickonec waharâ motâc ki bame ʒoaŋ gie bapa 7 fozejec.

³⁹Eme taha bapa e ʒoaŋ gie bapa namba 7 ira risierâ mocwâc honezejec. Ehame gukuczi fic sâpenao soka ŋedâmârec eme

⁴⁰honerâ jazame qânâ gukuc hawarinehec i bârârierâ hae râpeo jawao tuŋkepie razejec.

⁴¹Erâ qânâ sâpe fainao rârec rârec simeŋ fokac i fâze emasaŋ eniŋte jazazejec wâc. Eme wiac fâzekicne i hae râpeo jaha jawao hoŋkepie razejec.

⁴²Erâ qânâ ɋâricne rorâ ŋeŋetacnao hepie ŋeha simeŋzi ʒimickenʒepieŋ.

⁴³“Eme qânâ wiac ropie wahaocmu â sâpe fâze emasaŋ erâ simeŋ ɋâricnezi ʒimickepie fainao mocwâc gukuckeocmuo

⁴⁴ine taha bapazi ra honezejec. Eme gukuczi fic maŋnao soka ŋedâmârec eme ʒiŋuc manazo: Gukuc repicnezi fic maŋne fusucmakacte wâwânâŋhec ekac.

⁴⁵Iŋuc manarâ fic i heropierâ qânâ â paraŋ wiac‐ticne erâ simeŋ ʒimickekicne i hae râpeo jawao behepie razejec.

⁴⁶Me ŋic moc e ficzi motâc hehe foha raʒiwecko ine wâwânâŋhec erâ juha hae ŋafezejec.

⁴⁷Me moc e fic ira foocmuzi ŋaqi‐ticne ʒurezejec, â moc e fic ira nânâ nâocmu e wâc iŋuc jaha ŋaqi‐ticne ʒurezejec.

⁴⁸“Me fic i simeŋ ɋâricnezi bâpiaŋkepie faicnao gukuczi mocwâc mi fuame taha bapazi honerâ ʒiŋuc muzejec: Gukuczi omaeme ficzi ɋaɋacne jaha ŋekac.

⁴⁹Eme fic i wâwânâŋ tâmiric ʒuhuckerâ ŋeocte taha bapazi wipe piticne jajahec â jâmâzâc jâc dâkâne erâ muc bâbâroŋ â wiac âsu biaŋhec rozejec.

⁵⁰Rorâ wipe moc kuʒimaŋko opâ ɋâricne ŋekac irec faicnao qâhâmozejec.

⁵¹Iŋuc erâ jâmâzâc jâc dâkâne erâ wiac âsu biaŋhec â muc bâbâroŋ i wipe qâhâmokicnere socko mecne â opâ ɋâricnao mecne âke uruckerâ ficmaŋko tieme arec 7 ezejec.

⁵²E iŋuc ehuc wipesoc â opâ ɋâricne â wipe ɋâricne â jâmâzâc jâc dâkâne erâ wiac âsu biaŋhec â muc bâbâroŋ izi ficmaŋne ʒure ɋaɋackezejec.