Taha Bapare Sâcmutâc 13:8-34

⁸Eme taha bapazi mocwâc hone manac ecnehuc, wiczi fua sokac ewec, iŋuc honerâ ʒiŋuc muzejec: Ŋic e wicsanaŋ fuacnekacte wâwânâŋhec ekac.

⁹“Ŋic moc wicsanaŋ ecneme taha baparao jowa ranʒepieŋ.

¹⁰Eme taha bapazi hone manac ecnezejec. Ehame sahac‐ticne tamaehuc siwiŋneme sahac ʒâwâ‐ticne qaŋqaŋ ewec, eme sisiwiŋ fokac ira biuczi hâckerâ ŋeme honerâ ʒiŋuc manazo:

¹¹I wicsanaŋ raŋɋane, irec taha bapa e, ŋic go wâwânâŋhec jukomec, iŋuc âzâcnerâ ficko mi râezejec; ŋic e biac wâwânâŋhec ekac hâcne.

¹²Me wicsanaŋzi fua sawec erâ sahac‐ticne sasawa qizecnaonec fuŋkerâ wahaku kikenao tarakac i sâcke‐fâreme

¹³taha bapazi hone manac ecnezejec. Eme wicsanaŋzi sahac‐ticne sâcke‐fârewec, iŋuc honerâ ʒiŋuc âzâcnezejec: Go ɋaɋackekomec. Wiczi qaŋqaŋ efârewecte ŋic e ɋaɋackekac hâcne.

¹⁴Me biuczi erao hâckerâ ŋeme ʒiŋuc manazo: Ŋic e wâwânâŋhec.

¹⁵Eme taha bapa e hone manac ecnerâ ʒiŋuc âzâcnezejec: Go wâwânâŋhec ekomec. Wicsanaŋ fokacte biuc hâckekicnezi wâwânâŋhec ekac.

¹⁶Me biuc hâckekicnezi qaŋqaŋ eme ŋic e taha bapa mocwâc fuacnezejec.

¹⁷Eme taha bapazi hone manac ecnehuc, wic i biac qaŋqaŋ efârewec, iŋuc honerâ ʒiŋuc âzâcnezejec: Go ɋaɋackekomec hâcne.

¹⁸“Me ŋic mocte sahacko wicʒâhâc tackekicnao

¹⁹sisiwiŋ hawarine qaŋqaŋ me gogowac moc fuame taha bapa jâutunʒepieŋ.

²⁰Eme taha bapazi hone manac ezejec. Ehame sahac‐ticne biac dockeme sahac ʒâwâ‐ticne qaŋqaŋ eme taha bapazi honerâ ŋic ʒiŋuc âzâcnezejec: Go wâwânâŋhec ekomec, i wicʒâhâczi juku wicsanaŋ ewec hâcne.

²¹Me sahac ʒâwâzi qaŋqaŋ mi eme â sahac‐ticnezi biac mi dockeha taha bapazi honerâ ficko râeme ŋehuc juha ʒoaŋ gie bapa 7 tarazejec.

²²Ehame wiczi mesahac‐ticne gâcne sâcke‐fâreme taha bapazi ʒiŋuc âzâcnezejec: Go wâwânâŋhec ekomec, wicgezi wicsanaŋ ekac hâcne.

²³Me wiczi mi sokame ine ʒiŋuc muzo: Wicʒâhâcte râfâ sawa eme taha bapazi fâsâcne jukomec, iŋuc âzâcnezejec.

²⁴“Me ŋic mocte sahac ʒoczi ʒame pârâckerâ gowaeme qaŋqaŋ erâ foocmu,

²⁵ine taha bapazi hone manac ezejec. Ehame sahac ʒâwâzi qaŋqaŋ eha sahac‐ticne dockeme ʒiŋuc manazo: I wicsanaŋ hâcne, ʒoczi ʒakicnao fuawec. Eme taha bapazi ʒiŋuc âzâcnezejec: Go wicsanaŋ fua‐garekacte wâwânâŋhec ekomec hâcne.

²⁶Me sahac ʒâwâzi qaŋqaŋ mi ewec, me sahaczi biac mi dockehuc mâc bâŋeŋkeme taha bapazi honerâ ficko râeme ŋehuc juha ʒoaŋ gie bapa 7 tarazejec.

²⁷Eme ʒoaŋ gie bapa namba 7 ira taha bapazi ŋic e hone manac ecnezejec. Ehuc wic i fua sokac eme honerâ ʒiŋuc âzâcnezejec: Go wicsanaŋ fua‐garekacte wâwânâŋhec ekomec.

²⁸Me wic i mârâc fowec ijaha fohuc mi sosoka mâc gowaeme ʒiŋuc muzo: Ʒocbâruŋzi ʒame siwiŋnewec. Irec taha bapa e ŋic ʒiŋuc âzâcnezejec: Ʒocte râfâ sawa ekacte ɋaɋackekomec.

²⁹“Eme ŋic me ŋokac moc utunao me mecqaŋeŋnao wic moc fuacneme

³⁰taha bapazi wic i honezejec. Ehame sahac‐ticne dockeha sahac ʒâwâne bâŋeŋkeme taha bapazi ŋic ʒiŋuc âzâcnezejec: Utugao me mecqaŋeŋgao wic fua‐garekac i wicsanaŋ ekacte wâwânâŋhec ekomec.

³¹Me sahaczi biac mi dockeha â sahac ʒâwâzi gâgâpâc mocwâc mi ehuc bâŋeŋkeme taha bapazi wicte fuŋne iŋuc honerâ ŋic wichec e ficko râeme ŋehuc juha ʒoaŋ gie bapa 7 tarazejec.

³²Eme ʒoaŋ gie bapa namba 7 ira taha bapazi i mocwâc honezejec. Eme wiczi soka ŋedâmârec mi ewec, me sahac ʒâwâzi bâbâŋeŋ mi fuame â wiczi mi dockeme

³³ine ŋic e mecʒâwâ hehuc wicko ine mi hezejec. Ehame taha bapazi ŋic wichec e ficko râeme ʒoaŋ gie bapa 7 ʒuhuckerâ ŋezejec.

³⁴Eme ʒoaŋ gie bapa namba 7 ira taha bapazi wic honezejec. Ehame wiczi soka ŋedâmârec mi eme â sahaczi wâc mi dockeme taha bapazi ŋic ʒiŋuc âzâcnezejec: Go ɋaɋackekomec. Iŋuc âzâcneme ŋic e qoruc wiac‐ticne ʒure‐fârerâ ɋaɋacne juzejec.