Taha Bapare Sâcmutâc 11:24-46

²⁴“Ŋoŋe qowi â gisic iŋucne nâhuc wâwânâŋhec eniŋmu hâcne; eme moc e qâŋɋâŋ‐jeŋic ba bâuac ehuc wâwânâŋhec erâ juha hae ŋafeocmu.

²⁵Me moc e qâŋɋâŋ‐jeŋic tofane moc rorâ baraocmu e ŋaqi‐ticne ʒurezejec, e jahacne ine wâwânâŋhec erâ juha hae ŋafeocmu.

²⁶Qowi kike râqâc‐jeŋic dâkâpeaŋ fâuckekicne fuambiŋ, me nânâ nâhuc ŋâc mi heeŋgopieŋ jaŋere manapie wâwânâŋhec ezejec. Irec moc e ba bâuac ejarerâ wâwânâŋhec eocmu.

²⁷Erâ qowi me kike tape‐jeŋic 4‐zi rac warec eeŋgopieŋ jaŋere wâc manapie wâwânâŋhec ezejec. Ehame moc e qâŋɋâŋ‐jeŋic ba bâuac ejareocmu e wâwânâŋhec erâ juha hae ŋafeocmu.

²⁸Me moc e qâŋɋâŋ‐jeŋic rorâ baraocmu e ŋaqi‐ticne ʒurezejec, e jahacne ine wâwânâŋhec erâ juha hae ŋafeocmu. Ŋoŋe qowi iŋucne hâcne honec‐jopapie wâwânâŋhec enʒepieŋ.

²⁹“Wiac kecʒiŋuc jaŋe mâreŋko guru sâko jueŋgopieŋ jaŋere wâc manapie wâwânâŋhec ezejec: Qâqâto, ʒuc, fârio fuŋne fuŋne,

³⁰râoŋ, gugume, rekâ, gurac erâ kambarec.

³¹Qowi piic piic i jaŋere hâcne manapie wâwânâŋhec ezejec, ehame ŋic moczi qâŋɋâŋ‐jeŋic ba bâuac ehuc wâwânâŋhec erâ juha hae ŋafeocmu.

³²Me qâŋɋâŋ‐jeŋiczi wiac moc jâczi bakicne, me ŋaqi, me qowi sahac, me târu, me giere wiac i me i he heuac ejareme wâwânâŋhec eniŋmu. Irec wiac iŋucne i opâo râepie hurâ foha hae ŋafeme ɋaɋackezejec.

³³Me qowi iŋucnezi hapecko me kuʒio hume wiac maŋnao fokac izi wâwânâŋhec eme kuʒi qanʒaŋnenʒepieŋ.

³⁴Hapec iŋucnao opâ fokac i nânâ faio hesiepie wâwânâŋhec eocmu, me hapec irecnec opâ nâpie wâwânâŋhec jaha eocmu.

³⁵Me qâŋɋâŋ‐jeŋic moczi waha qahuc wiac i me i he heuac ecneme wâwânâŋhec eocmu. Irec nânâ ʒaza qânâ nombâŋ me ʒafe he heuac ejacteme hezuc hemasec ejactenʒepieŋ. Jahe wâwânâŋhec epicte honec‐jofapie wâwânâŋhec jaha ezepirec.

³⁶Qowi iŋucne moczi opâ ʒâŋeo me opâ nombâŋko hume opâzi sifu ɋaɋacnea foocmu; mâc qowi opâo hukicne i ŋic moczi ba bâuac ehuc wâwânâŋhec eocmu.

³⁷Me qowi i jaŋere qâŋɋâŋte dâkâne moczi hândâŋ titiere biŋe râekicne irec fainao ferâ heuame hândâŋ izi sifu ɋaɋacne foocmu.

³⁸Mâc hândâŋ i qanaŋ opâ hehapie ʒâhec qâŋɋâŋ iŋucnezi heuame ine manapie wâwânâŋhec ezejec.

³⁹“Qowi nâcjopaniŋte mana‐ŋarekicne jaŋeraonec moc hâmome ba bâuac ecneniŋmu ine wâwânâŋhec erâ juhapie hae ŋafezejec.

⁴⁰Me ŋic moc e qowi hâmocne i nâocmu e ŋaqi‐ticne ʒurerâ wâwânâŋhec erâ juha hae ŋafezejec. Me moc e qowi hâmokicne rorâ baraocmu e wâc iŋuc jaha ŋaqi‐ticne ʒurerâ e jahacne wâwânâŋhec erâ juhame hae ŋafezejec.

⁴¹“Gisic wiac piic piic mâreŋko gerec gerec bahuc jueŋgopieŋ jaŋe wiac mamakâcne eŋgopieŋte mi nâcjopanʒepieŋ.

⁴²Qowi wiac foforâ jueŋgopieŋ me mekike‐jeŋiczi babarâ raeŋgopieŋ me mekike‐jeŋic bocjaha, erâ wiac sasawa mâreŋ faio gerec gerec bahuc jueŋgopieŋ jaŋe wiac mamakâcne eŋgopieŋte mi nâcjopanʒepieŋ.

⁴³Ŋoŋe wiac gerec gerec bahuc jueŋgopieŋ jaŋe ba bâuac ejarehuc mi makârenʒepieŋ, ŋoŋe juju‐ŋeŋic hegâpârenʒipiŋte wiac i ba bâuac ejarehuc wâwânâŋhec mi enʒepieŋ.

⁴⁴No Wofuŋ Anutu‐ŋeŋic jukopac hâcne, no tiri jukopacte ŋoŋe juju‐ŋeŋic bâtirihuc tiri jaha junʒepieŋ. Ŋoŋe mâreŋko wiac gerec gerec bahuc jueŋgopieŋ jaŋe ba bâuac ejarehuc wâwânâŋhec mi enʒepieŋ.

⁴⁵No Wofuŋ‐ŋeŋiczi Anutu‐ŋeŋic jupemurâ Aigita mâreŋkonec jowac‐ŋopa wefupo, irec no tiri jukopacte ŋoŋe tiri jaha erâ junʒepieŋ.”

⁴⁶Dâŋ ʒizi wipe qowi â wiac jujune sasawa opâo me mâreŋko gerec gerec bahuc jueŋgopieŋ jaŋere sâcmutâc.