Tɛnɛ Faalaaliiti 7:15-27

¹⁵Wɛlɛ nii ɠa é kɛa gè ɠula, gè ʋa è laaɠomisu, gè ɠɛa pɔ gè è ɠa, gè è ɠaa.

¹⁶Gè nà-betei ɠaaɓɛtɛa, ga dasuzeɠei suʋuai, ta geze zeɠei é ga Ezipete gelei.

¹⁷Gè dàazuʋɛ makugi nɛa ga, miilegi, ta alɔwɛgi ta kanɛlegi.

¹⁸Ʋa de lɔ ziimaɠɛɛi zu, eyɛsu sobui zeeli, de lɔ ɓɔɠɔyiimai ma nɛɛbɛi zu.

¹⁹Mazɔlɔɔ sìnigi la ʋɛ, pɛlɛi wu, diiʋɛ siɛ ɠooza ma.

²⁰É wali mɔinmɔin seɠeʋɛ ya, kɛni alugi a zeina gize la, é ʋa ʋa.»

²¹É vɔnini ma ga ná-keleɠelegi, é mɛɛnni ga ná-woo nɛɛnɛgiti.

²²Gaamago nɔ, é ʋilɛni anzanui naa ʋolu, eɠɛ nikɛi ti liizu la paazuʋɛ, eɠɛ ɓoloɠa nui, ti gilizu ga, ti maaɠolo,

²³eyɛsu mɛɛin sɔ zii ʋa, eɠɛ wɔnii é ɠaazuvilɛzu ga é ʋili tumɔi zu, é la inɛinɛsu ga zɛnvui, é faaɓaagi laawu.

²⁴Dòun zunuiti, niizu niina, à woilo gòoi ma! À dama ga dàawooiti!

²⁵Wo-yii mina valibo, é ʋa ʋilɛ anzanui niima zii ʋolu! À mina ɠaka, wo ʋa ʋilɛ ná-pelei ʋa!

²⁶Mazɔlɔɔ ná-nu maawanaiti mɔinʋɛ, niiti ti zaai, ta niiti é ti undaaʋiligai, ti ɠɛni ga zɛbɛsu nu wolaiti.

²⁷Ná-pɛlɛi ɠa é ga gɔvɛalaazu ʋelei, nii é yeizu saai zeizuʋɛ.