Tɛnɛ Faalaaliiti 2:7-18

⁷Toɠa undaanɛɛ vai makɛsu sɔle nuiti bɛ. Eɠɛ kɔɔɠɔ zɛpɛgi, toɠa naati makɛ, niiti ti ziɛzu telebodai zu.

⁸Niiti ti ta-eteai ziɛzu ga sɔledai, toɠa ɓɔ naati ba. Niiti ti bɛ ga wooɠɛɠila nuiti, toɠa ɓaa naati ta-ʋelei maazu.

⁹Ɗa zoo è faiti zɔɠɔzuɠa, telebodai, ta sɔle fai, ta faagaamai, è pele ʋagɔiti kpein kwɛɛ.

¹⁰Mazɔlɔɔ ɠimalai ɠa ʋa é zei è-yiimaʋɛ, faaɠwɛgi ɠa ɠɛ ga è yiima vaiti.

¹¹Kidafaawui ɠa è makɛ, keleɠelegi ɠa ɓaa è maazu,

¹²ga ti è unmɔɔ, ti è ɠula pele ɲɔiti su, ta nu ɲɔiti ta-yaava ɓɔɛiti,

¹³niiti ti ɠɛlɛzu gaama ʋelei ʋa, ti ɗa ziɛ ga pelei suɓidiai.

¹⁴Ti-yiimai ga faa ɲɔu ɠɛɛ vai, ti ɠoozunɛɛzu ga ti lɔ woya vai zu.

¹⁵Ti ziɛ ʋeleiti maaʋegai, ta-ʋeleiti suzeiʋɛ.

¹⁶Naazu, ɗa ɠizo wɛɛnziɛ anzanui ná-tɛgai ma, é ga koloɠolo anzanui woo nɛɛnɛgiti ti da,

¹⁷nii kɛlɛai sinigi ʋa, é ɠɛni zea ma niinɛ yeei, é yeema ná-vulu minazeɠegi ma, nii é boni ná-GALAGI laaseigi zu.

¹⁸Mazɔlɔɔ maalaaʋena saai ʋɔ pelei, ʋɛ ná ga seizuʋɛ, siɛ ʋelei ɠa liizu la gɔvɛalaazu.