Tɛnɛ Faalaaliiti 28:8-28

⁸Zɔi é ná-sɔlɔɔgi maamɔinzu ga talama walii, nii dateʋegai, naa ɠa sɔlɔɔgi ɠaalɛɛzu ba naa ʋɛ, nii a maawɔin nuiti maawɔinɠa.

⁹Ni nu a ʋoluavena, ga é mina woilo GALA ná-tɔ gooi ma, ná-GALA falii wɔin ɠa zeɠe GALA ma.

¹⁰Zɔi é telebo nuiti kakasu, é ti ʋilɛ pele ɲɔi ma, toɠa loo zeɠei zu, nii é bɔai. Kɛlɛ niiti ti ziɛzu ga sɔledai, undaanɛɛi ɠa naati tuɠɔ.

¹¹Kpɛtɛ nui ɠeleɠelegɛ ɓɔɠɔ nɔ ɠaazu, kɛlɛ bala nui keleɠelegai, naa ɠa zoo é poluɠula.

¹²Siɛgi zu telebo nuiti ti kundiɠilai zɔlɔɔsu da, lɛbiya ɠa ɗa ɠɛ lee ɛsɛ pɛ bɛ. Kɛlɛ siɛgi zu nu ɲɔiti ti wuzeɠezu la, ɛsɛ ka ɗa lɔɔɠu.

¹³Zɔi é ná-tɔ koloɠologiti dɔɔɠuzu, naa la ɠula ɓɔɠɔ numa, kɛlɛ GALA ka ɗa naa zuvaayɛ, zɔi é laazu zɔ ga é ɠɛlɛ ti ʋa.

¹⁴Undaanɛɛ nu ɠa ga naama nui, nii yeenɔpɛ é luazu faa ɲɔi ɠɛɛ vai ʋa, kɛlɛ zɔi é ɠikpaazu, é ɗa faa ɲɔi ɠɛ, naa ɠa lɔ maanɔɠɔi zu.

¹⁵Ʋelei zalai la, é zikɔzu, ta filɛ zuai pului ma, ʋele ɠana faa ɲɔu ɠɛ nui la, nii é masadai ɠɛɛzu nuɓusɛiti unda, ti ʋalagai.

¹⁶Kundiɠii a ʋalana ɠigi ma, toɠa ɗa telebotalai wola ɠɛ, kɛlɛ zɔi é ɠɛlɛzu kakama ani mii vai ʋa, toɠa ɗa lɛbi kundiɠilai zu.

¹⁷Nui nii nu ʋaa vai ziimaʋɛ, toɠa ɗa ɓizɛ ga lia ná-kabayeɠei ʋɔ pelei, nu nɔpɛ ge mina pele ɓesa tuɠɔ.

¹⁸Nu-o-nu nii siɛ ʋelei zɔlegai, naa ɠa kizogi zɔlɔɔ, kɛlɛ sɔletala nui, é pele zuɓili felegɔi ziɛzu, toɠa loo gila su.

¹⁹Zɔi a tii ɠɛɛzu ná-zooi ma, naa ɠa laamianigi zɔlɔɔ, kɛlɛ zɔi é ʋilɛsu fuun faiti polu, naa ɠɔnɔgi ɠa ɠɛ ga daanɔɠɔwogi.

²⁰Nui é ga lada nui, zee laa ɠa ve ga tuyai, kɛlɛ zɔi é wɔinni é ɓɛtɛ ga gaazuvilɛi, maanɔɠɔi la ʋoola ba.

²¹É la vizɔni ga nu zeelɔzɔɠɔzui ɠɛ nuɓusɛiti zɔɠɔzu, anɛɛ naa ʋe, nui ɠa zoosu é faa ɲɔi ɠɛ ɓulu ɓuɠai zɔlɔɔ fai zu.

²²Zunui é ga gaazuɠulapɔ nui, toɠa ɗa kpɛtɛi ɠaiziɛ ga gaazuvilɛi, toɠa ɗa yeema ga baladai ɠa ʋaazu pɔ.

²³Zɔi é zelii losu seiɲɔɠɔi ma, gaaɓelasu naa ɠa ɗa ná-faanɛɛi wuuɠwɛɛ, é leʋe zɔi ʋa é maamusɛi wosu ga nɛgi.

²⁴Nu-o-nu é kaazu ga faa ɲɔu laade, ga é kɛɛɠɛ ta dee maavo, é la vizɔni toosu nu ʋa.

²⁵Zunui nii sɔlɔɔgi la ziilɛiɗa, toɠa ɗa kpɔɛi wuzeɠe, kɛlɛ zɔi é ɓɔɠɔ ɠalivaazu Ɠɔoɠɔ GALAGI ma, toɠa ɠɛ anii pɛ su nɔ yaɠaba.

²⁶Ɗɛi è laazu ɗa-ɠigaiziɛiti nɔ la, ɗa ga ɠimalala nu, kɛlɛ zɔi é ziɛzu ga ɠimalai, faaɓaagiti ta ʋoola ba.

²⁷Zɔi é faanɛɛi ɠɛɛzu bala nuiti bɛ, é la yɛga kpala zu, kɛlɛ zɔi é ɠaazuʋɛɛzu ma, seiɲɔɠɔi ná-kpɔlɔi luɠɔ, toɠa foovoo mɔinmɔin sɔlɔɔ.

²⁸Siɛgi zu faa ɲɔu ɠɛ nuiti ti zeizu la kundiɠilai zu, ɛsɛ pɛ ka ɗa lɔɔɠu, kɛlɛ siɛgi zu ti loozu bu la, telebo nui ma mɔinmɔin ka ɗa ɠula kɛlɛma.