Tɛnɛ Faalaaliiti 24:14-33

¹⁴Ɠitoo su, ga ɠimalai ʋagɛ ɗa-eteai ma vaa ma. Ni ɗa zoona è ziɛ la, ɗa zoo è ɠoozunɛ ʋelela ʋelei, ɗa-ɠitogi la ɠoloɠologa.

¹⁵Mina woya lɔ telebo nui ná-pɛlɛi ma, ga faa ɲɔu, mina seizuʋɛ ɠoloɠolo.

¹⁶Mazɔlɔɔ anɛɛ ni telebo nui loo la ɠa ɠɛɛzu lɔfela, toɠa wuzeɠe, kɛlɛ faa ɲɔu ɠɛ nuiti su ɠa ɗa ɓezeɠele ga maanɔɠɔi.

¹⁷Mina ɠoozunɛ ni è zili nui a loona, ni a lɔɔna kpɔlɔi zu, mina kua wo ga koozunɛɛi.

¹⁸Ɠɔoɠɔ GALAGI ɠa naa ɠa ga wanama vaa, é la mɔ yiiɠaawana ma.

¹⁹Mina yiiɠaawana naati ta-vaa zu, niiti ti faa ɲɔi ɠɛɛzu, mina ɠaazuɠula faa ɲɔu ɠɛ nuiti ba.

²⁰Mazɔlɔɔ kulanuma la naati tuɠɔ, niiti ti faa ɲɔi ɠɛɛzu, ti-yɛnvui ɠa za eɠɛ lanboi.

²¹Dòun zunu, unfe Ɠɔoɠɔ GALAGI ma ta masagi. Mina ʋɔɔkpɔ naati ba, niiti ti pɔ ga ti fai pɛ falibo.

²²Mazɔlɔɔ ti ɠoloɠolo fai ɠa ɠula ti viliba, ɓɛ ɠa é kpɔlɔi ɠwɛɛ, nii Ɠɔoɠɔ GALAGI ta masagi, ʋaazu seizu ti ma?

²³Wɛlɛ nii ɠa ɠima nuiti ti boga mɔnɔ. Topolui ɠa ga faa ɲɔi tukpɔi ɠaaleʋezuʋɛ.

²⁴Ni tukpɔɠaaleʋe nui a ɠɛna faa ɲɔu ɠɛ nui ma: «Sɔ ge la è ʋa,» nuɓusɛiti ta foovo, ziiti ti yiiɠaawana ma.

²⁵Kɛlɛ tama zɔiti ti faa ɲɔu ɠɛ nui ʋeelalazu, naati ta ɠɛ gaanɛ zu, tuya ɠa loo ti ʋɛ, é ɠɛ ga ta-undaanɛɛ.

²⁶Gooɠaaʋotegi é veezu ga gaamai, naa ɠa ga bɔɔlalai ma ʋoogi.

²⁷Aisa è ʋa ɗa-ʋɛlɛi lo, kɛni è etea ʋele wotiiti kɛ dɛ, è ɗa-ɓalagi ɠɛʋele ɓɛtɛ, é zoloo molo leʋei ma.

²⁸Mina zeele woo wo fuun è-zeiɲɔɠɔi laalɔɠɔma, mina nu yaava ga è-laawooi.

²⁹Mina ɠɛ ma: «Nà sosu, eɠɛʋelei é sòni da, nà seizu zunu tɛi zea, eɠɛʋelei é kɛni la ga ze.»

³⁰Gè leʋeni ɲaka nui ta ná-kpala kpelamaʋɛ, ɠimalala nui ná-leezɛn ɓelei laaʋɛ.

³¹Wɛlɛ, kpolo ɠaingiti ta gui ɲɔiti ti ɠɛni ʋɔnɔsu ná pɛ, siɠigi é ɠɛni ma ga sasai, naa woloni.

³²Gè naa ɠaai ma, gè tɔɔzeini ga ɠigaiziɛ, nii gè pɛtɛni, ɠigi gè sɔlɔɔni naa ma, é ɠɛni ga:

³³è lago ɲi nɔ, è lago ɠaazuʋɛɛ ma fɔin nɔ, è zaamale, è yeeiti da ɓɔɠɔ ma.