10Ɛsɛ nɔ ɠa é ná-ziizoolɛi ɠwɛɛ, ta ná-koozunɛɛi, nu ɠili ge la zooga é ʋa nɔnɔ zɔlɔɔ naa zu.
11Faa ɲɔu ɠɛ nuiti ta-ʋɛlɛi ɠa wolo, kɛlɛ sɔle nuiti ta-zeɠe ɠotai ɠaa ɠa wɔɔlɔ.
12Nu mɔinmɔin ka ɠisiɛzu ga pelei ti ma pagɛ, kɛlɛ tɔun, ta pelei ma, nii gaaɓelasu, é liizu ga tiye, é ti lɔ saai zu.
13Ɲɛɛi ɠa zoo é ziizoolɛi ɠaazumaalɔɔɠu, koozunɛɛi ɠa zoo é ɠaaɓela ga ziizoolɛi.
14Kɔzɔba nui ɠa ɗa ná-kɛɛwotiiti ma ɠulanumai zɔlɔɔ, kɛlɛ nu ʋagɔi ɠa ɠoozunɛ nɔnɔ ma ziɛ ʋeleiti ma ɠulanumai zu.
15Nui nii é la dɛ faa mɔinmɔin kwɛɛ, toɠa ɗa la naati kpein da, niiti ti wosu ma, kɛlɛ kidafaawu nui ɠa ɗa ziɛ ga keleɠele.
16Ɠima nui ɠa ɗa lua faa ɲɔi ʋa, é ʋoluave, kɛlɛ ɠimalala nui ɠa ɗa yiiɠaawana, é kɛ, tɔɔzei daave ɓɔɠɔ la.
17Ziiɠula nui ɠa ɗa ɠimalala vaiti kɛ, nui kigaiziɛ ɲɔi ziimaʋɛ, toɠa ɗa wɔinzeɠemai maaloli ɓɔɠɔ ma.
18Nuiti ti la dɛ faa mɔinmɔin kwɛɛ, naati ta-ʋoganii ɠa é ga ɠimalalai, kɛlɛ kidafaawu nuiti ta-masa bɔɔlɔgi ɠa é ga faaɠwɛgi.
19Nu ɲɔiti ta ɗa unmaayei nu ʋagɔiti bɛ, faa ɲɔu ɠɛ nuiti ɓalaa ta ɗa kɛ ɠana nɔ telebo nuiti ta-ʋɛlɛlaʋɛ.
20Bala nui la nɛɛni nu nɔpɛ bɛ, anɛɛ seiɲɔɠɔiti, kɛlɛ kpɛtɛ nui wɔɔlaiti mɔinʋɛ gola.
21Zɔi é seiɲɔɠɔi wɔinzeɠezu, naa ɠa koto ɠɛɛzu, kɛlɛ undaanɛɛ nu ɠa ga naa, nii é maanɔɠɔ nuiti maawɔinɠaazu.
22Niiti ti ɠisiɛzu faa ɲɔi zu, naati ta kaka pelei ma, kɛlɛ niiti ti ɠisiɛzu faa ʋagɔi zu, naati ta kɛɛzu nuɓɔɠɔlai ta gaamai zu.
23Botii kpein ka kulanumai ba, kɛlɛ pului ɠa kpɔɛzuɠula wafuungi ʋolu.
24Ɠima nuiti ta-masa bɔɔlɔgi ɠa é ga ta-naavoloi, ɠimalala nuiti ta-vaaɠaaɠaalalai ɠa é ga ta-litigi.
25Gaama wo zeelei ɠa ɗa zɛnvuiti kizo, kɛlɛ zɛɛ wo zeelei ɠa ga yaava nu.
26Zɔi é luazu Ɠɔoɠɔ GALAGI ʋa, naa ɠa kito gola zɔlɔɔ, ná-doun zunuiti ti dɔɔɠuzu zɔlɔɔ pɔ bɛ.
27Ɠɔoɠɔ GALAGI ɠaazuluabai ɠa é ga zɛnvu ɗɛungi, toɠa nu ɠizo saai ná-baliiti ma.
28Nuɓusɛi ná-mɔin ɠa é ga masagi ná-lɛbiyai, kɛlɛ nuɓusɛiti maaʋɛlɛ vai ɠa ɗa kundiɠii ɠoloɠolo.
29Zɔi zii la ɠula fala, naa ɠa ná-ɠimala wolai lɛɛzu, kɛlɛ ziiɠula nui ɠa ɗa ná-ɠimalalai zulɛ.
30Ziilɛigi ɠa é ga kpusɛi ná-sii zuɠoozagi, kɛlɛ toloi ɠa é ga seeɓɛi ma ɠaeiti su.
31Nu a bala nui maanɔɠɔna, è Kpɛtɛ Nui ʋɛlɛʋɛlɛga, kɛlɛ nu a maanɔɠɔ nuiti maawɔinɠaana, è ti Ɓɛtɛ nui lɛbiya.
32Faa ɲɔu ɠɛ nui ná-yaavai ɠa ɗa toka, kɛlɛ kitogi ɠa ɗa ɠɛ telebo nui ya, eyɛsu saai.
33Ɠimalai ɠa ɗa zei keleɠele nui yiimaʋɛ, naa ɠwɛɛgɛ ɓalaa ɠimalala nuiti saama.
34Telebodai ɠɛɛ vai ɠa ɗa zooi wɔɔlɔ, kɛlɛ kotoi ɠa ga nuɓusɛiti kpein unfe faa.
35Masagi ná-unfemai ɠa ɗa ɠɛ botiɠɛ nui naati bɛ, niiti ti botii ɠɛɛzu bɛ ga ɠimalai, kɛlɛ zɔi é unfe fai ɠɛɛzu, ná-ziiɠaawanai ɠa ɗa zeeli naa ma.