Tɛnɛ Faalaaliiti 13:1-8

¹Ɠima loun zunui ɠa ɗa ɠizɛ maaɠoloi zu, kɛɛɠɛ bogai la, kɛlɛ waso doun zunui la ɗa ga woiloga zeliloma ɠila kpalaa ma.

²Ɗa zoo è ani ʋagɔiti sɔlɔɔ ga nu laawooiti maaʋele, kɛlɛ faa ɲɔu ɠɛ nuiti ta-etea ziɛi ɠa ga toomai.

³Zɔi a dama ga daawooiti, naa ɠa zɛnvui makɛsu, zɔi é kpɔɛi wola zuɠulazu, é la ɠidaazu bu, naa ɠa ɗa ɓɔɠɔ loo ya.

⁴É la faa ʋaa dɔɔʋɛ nui ma, gaazu ʋa ɠula ani ʋa, kɛlɛ botiɠɛ nu wolai ɠa ɗa naa zɔlɔɔ, nii wɔin ma.

⁵Telebo nui ɠa ɗa zɛɛ ɓɔɛiti wɔinzeɠe, kɛlɛ nu ɲɔi ɠa ɗa unfe fai ɠɛ, ta tɔɠɔ ɠoloɠolo fai.

⁶Zɔi é siɛ ʋelei zɔlegai, telebodai ɠa ɗa naa makɛ, kɛlɛ faa ɲɔi kotoba nuiti ti kɛɛzu, naa ɠa a ɗa ti undaaʋili.

⁷Tanigaa ta kɛɛzu eɠɛ ta ɓɛtɛ, tama ani nɔpɛ ge la ti ya, tanigaa ti ɓɔɠɔ ɠɛ eɠɛ bala nu, kɛlɛ anii ti ya ga gola.

⁸Tanisu naavolo nui ɠa ɗa ani zala, é ʋa zɛnvui unmɔɔ, kɛlɛ bala nu la woiloga zeliloma ma.