Suuki 5:5-14

⁵N naxa keli alako n xa naadɛ rabi n xanuntenyi bɛ. Labundɛ nu na n bɛlɛxɛ ma, ture nu na n bɛlɛxɛsolee ma. Na birin naxa lu naadɛ rabi se ma.

⁶N naxa naadɛ rabi n xanuntenyi bɛ, kɔnɔ a ɲan nu bara siga. N bɔɲɛ naxa sunnun. N naxa a fen, kɔnɔ n mu a toxi. N naxa a xili, kɔnɔ a mu n ma xili ratinxi.

⁷Taa kantamae to n to, e naxa n suxu, e n bɔnbɔ, e n ma xinbeli dugi muɲa.»

⁸«Darisalamu ginɛdimɛe, n bara wo mayandi, xa wo bara n xanuntenyi to, wo xa a fala a bɛ a xɔli bara n suxu xanunteya xa fe ra.»

⁹«Ginɛ tofanyi fisamante, i xanuntenyi fan a birin bɛ? I bara muxu mayandi barima a fan a birin bɛ?»

¹⁰«N xanuntenyi kiri fiixɛ, a ragbeeli. A kolon ɲɔxun na xɛmɛ wulu fu ya ma.

¹¹A xunyi luxi nɛ alɔ xɛɛma fanyi, a xunsɛxɛ ifɔɔrɔxi alɔ xaxa fɔɔrɛ xabe.

¹²A yae rayabu alɔ ganbɛ naxee tixi xure dɛ ra, e fiixɛ alɔ xiɲɛ, e yanbama alɔ diyaman.

¹³A xɛrɛe luxi nɛ alɔ labundɛ yailande, a dɛ kiri maniyaxi sansi fuge tofanyi nan na, a xiri ɲɔxun.

¹⁴A bɛlɛxɛ tofan alɔ bɛlɛxɛsolerasoe xɛɛma daaxi, diyaman na naxan ma. A fate luxi nɛ alɔ sili ɲinyi fiixɛ, gɛmɛ tofanyi mɔɔli nde, yee masoxi naxan ma.