Sua Tutŋana 9:10-18

¹⁰Mbulu tau tomototo Yooba mi teleŋleŋ la kalŋaana, ina ŋgar ambaiŋana uunu ŋonoono. Pa sombe tuute kat Anutu ta potomŋana i, inako tarao be tikilaala kat ŋgar iŋgoi ta ambai ma ilip.

¹¹Ŋgar ambaiŋana ko iseeŋge swom ma molo. Ko ikam ma kom ndaama boozo, mana meete.

¹²Tana nu sombe to ŋgar ambaiŋana, nako iuulu u ma biibi. Mi sombe pakurkur itum mi zorzooro, na kozo re u. Pa mbulu ku tana ko ipasaanu.

¹³Ŋgar kankaanaŋana, ina kembei moori ta le ŋgar somŋana, mi irao iyaraama itunu som, mi kalŋaana izalla sorok.

¹⁴Ikewe piti som. Imbutultul su ruumu kini kwoono bekena iboboobo la pizin tomtom be tila kini. Mi ilala mbalia kini ta imbotmbot sala lele mbukuunu ta igarau kar na tomini be iboboobo zin tomtom.

¹⁵Zin wal ta matan iŋgalŋgal zaala ambaiŋana be titoto na, ni iboboobo la pizin bekena iyaaru zin ma tizem zaala ambaiŋana.

¹⁶Mi zin wal ta ŋgar kizin ipet zen na, ni izzo pizin ta kembei: “Ai, niom wal ta leyom ŋgar biibi som na, niom ta boozomen kamar ruumu tio.

¹⁷Pa yok ta so takam kuumbu pa i, ina inamut kat. Mi kini ta so tekewe mi takanan, ina ikamam ŋgurende.”

¹⁸Tamen zin wal ta tileŋ la kalŋaana ma tila kini na, tikilaala som. Zin wal ta so tiwe leembe kini, na kaimer ko timetmeete ma tisula len naala.