Uva Maara Koqera 9:10-18

¹⁰Ho vaiintivano koqe avu aato varareva irera, viva avuni Nora Kotira aatu naane qeteharo variarire. Kotiva takuqu kero vairara tiro, vaiintivano virara kankoma kero irirera, vira avu aatovano koqema kero varianaro.

¹¹Koqe avu aatovano ai koqema amitairara are maa vataraqaa airi ihima qaqi variqira vinara.

¹²Ai avu aatovano koqe avu aato vairera, vi avu aatova ninama koqema amitaanaro. Are vi okarara qoririma kehara naaraihama amitairera, vira kaara are nenama nena qoraiqama kenara.

¹³Qora avu aatovano vaireva, nahenti vovano naverai ti vaira voqaarama vairo. Vi nahentira avu aatovano qora avu aato vaivaro viva kia koqe okara iri tave vaiva vaiharo

¹⁴nora vatuka vuruni nai naavu qentiana taintaqaa oquviro vaiharo

¹⁵vaiinti nahenti vitare aitare i variaka naareharo mintima tiro:

¹⁶Ne kia avu aato vataaka, homa maini anivarave. Ne kia vo okara vo okara kankomake iri tavaaka,

¹⁷ne kiae iriavo? Namari muara kaqake neva koqema ianarove. Kara muara varake neva hiakaama ianarove, ti vaira. (Uva tuqantaakero nahenti muara ni variarara ti vaira.)

¹⁸Viva minti ti vaimanta vaiinti vika kia kankomake iriraiti, vira naavuqi avuni oriqetaaka, vika qutuma vuavo. Viva naaraimanta viva inaini vuaka, vika ekaa qutu vuaka varianaini otu variavo.