Sua Tutŋana 26:1-21

¹Iti tuute: Sombe lele ibayou, na irao ŋauŋau isu na som. Mi sombe yaŋpat isu pa mazwaana ki kini ŋgaamaŋana, inako ipasaana kini. Ina raraate men pizin wal kankaanŋan ta tizorzooro na. Sombe tapakur zin, ina indeeŋe som. Pa kaimer zin ko tikam pataŋana piti.

²Sombe tomtom sa ikam ŋoobo mbulu sa som, mi tisuŋ sosor pini be Merere ipasaani, na suŋŋana tana ko irao ikam kosa sa pini na som. Ina kembei man ta irie ma ila, mi le muriini sa be imbot pa na som.

³Koroŋ ta boozomen kan uraata makiŋ. Re na, taballis zin hos pa. Mi wooro na, tuurur la bapolo kuzun bekena tapazal zin pa. Mi teene ta kembena. Imbotmbot be tabalis zin wal kankaanaŋan pa! Naso tepei ŋgar kizin.

⁴Wal kankaanaŋan ta tizorzooro na, pekel sua kizin talliŋana pepe. Kokena nu we kembei ta zin.

⁵Wal kankaanaŋan ta tizorzooro na, zem zin ma tizzo sua kizin talliŋana pepe. Re be pekel. Kokena maane men, to nin se mi tindemeere sorok kembei tirao pa ŋgar.

⁶Nu sombe ŋgo tomtom kankaanaŋana sa ma ila be iso kalŋom pizin wal pakan, nako kam pataŋana pa itum. Ina kembei nu yembut itum kumbum ma ila ne. Pa ni ko ila ma itooro kalŋom, to ikam ma malmal ipet.

⁷Wal kankaanaŋan ta tizorzooro na, sombe tikam sua tutŋana pizin tomtom, na asiŋ ko ileŋ la kalŋan? Som. Sua kizin ko mburaana som, kembei tomtom ta kumbuunu imeete mi kolkol ma imbotmbot.

⁸Wal kankaanaŋan ta tizorzooro na, tapakur zin pepe. Pa ina takam mbulu talliŋana tabe imiili piti mi ipasaana iti. Ina kembei tembe ta tuurpe kat som, mi ka pat imiili ma ipetepaala ndomondo na!

⁹Wal kankaanaŋan ta tizorzooro na, sombe tikam sua tutŋana pizin tomtom, na tire zin. Pa sua tana ko imiili pa zitun! Ina kembei tomtom ta iwin ma ikankaana, mi iteege wooro matanmatanŋana mi wooro tana iŋgal namaana.

¹⁰Wal kankaanŋan ta tizorzooro na, mi zin wal ta tuute zin som na, tuur zin be tikam uraata piti pepe. Mbulu tana kankaanaŋana kat, kembei tomtom ta iwenweene sorok zin tomtom pa peene lutuunu.

¹¹Wal kankaanaŋan ta tizorzooro na, irao tizem mbulu kizin talliŋana ma imborene kat na som. Kaimer ko tikam mini, kembei me ta ilulu, to imiili mi ikan luluŋana mini.

¹²Wal kankaanaŋan, ina ipata piti be tepei ŋgar kizin. Mi tomtom ta so indemeere sorok kembei ni irao kat pa ŋgar, sombe totoombo be tepei ŋgar kini, nako tarao som kat.

¹³Wal maolŋan, sombe toso zin be tila ma tikam uraata, nako tipandelndel sua piti ma tiso: “Aiss, nio mburoŋ som. Pa laion biibi sa ko imbotmbot zaala ma iŋgi. Kokena imaŋga mi ikan yo!”

¹⁴Wal maolŋan, sombe tikeene, na titortooro zin sala mbalia kizin, kembei kataama ta ilala mi imarmar.

¹⁵Wal maolŋan na, tiŋgwol kat. Naman isula timbiiri leleene be tipei kan kini. Mi naman ipata be tiur ila kwon!

¹⁶Wal maolŋan tire zitun kembei tirao kat pa ŋgar. Tipakurkur zitun ma tiso ŋgar kizin ilip pizin wal lamata mi ru ta len ŋgar na.

¹⁷Tomtom ta so izeizei lene ŋoŋi kizin wal pakan, ina ni kembei tomtom ta imbuulu me ki waene toro. Kozo ire i: Kokena me tana imaŋga mi ikani!

¹⁸Tomtom ta so ikam sua pakaamŋana pa waene toro, mi kaimer isu mini mi iso: “A, kam ŋgar boozo pa sua tana pepe. Ina nio aŋkam ŋeu pu men.” Na tomtom ta kembei, ŋgar kini italli kat. Ni kembei tomtom kankaanaŋana ta iwenweene sorok zin tomtom pa peene lutuunu tau timus koroŋ sananŋana ise mataana mi you ikanan la.

²⁰Tesegergeere you, to ikanan. Som, to imeete. Mi ŋoŋi ta kembena. Sombe tomtom tininin kao pa som, nako karau men mi imap.

²¹Tesegergeere you, to ikan ma biibi. Mi zin wal ta tizorzooro pa sua na, ta kembena. Ko tikam ma ŋoŋi iwe biibi.