Siraga 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

¹Waneigini dewaore hono wiriyagua ogoninaga turu holeni nahabe. Ti mine hayagua nde tigua Anduane Homogonaga mana ngago talialu nabulebira.

²Tigua Anduane Homogo kagohondo gi howa ibuni andaneha ha nabi heagua nde waneigini dewaore hono wiruda lowa ti turu nahabe.

³Waneigini uruni tigua í̠na biabe erekuibi bialu ti handaya ho harigonaga mani nde tigua aribia halu í̠ handaya ho holobada lo manda nabibe. Heneneore waneigini mine haga daosini mbira (1,000) kagoha bayale mbira hangu holebira. Ainde agali mbira ibu waneigini dewaore howa bibahendeoreme Anduane Homogonaga bi mana ngago hale nahaga heagua nde agali ogoni ibu waneigini hono wianabi heangi homedale nde karulape.

⁴Wali agaliyaguabi mini gigabi mbira heagua nde tinaga dindi ngagobi bayale dege wiaga. Anigo wali agali dewame mana ngago talia nabiyagua nde dindi mo ko haiore hagane nga.

⁵Mbirale uruni dewaore biyane i̱ninaga deme handaga biru. Ani bialu dewaorebi ani biya laga biyane hale haru.

⁶Wali agali Anduane Homogonaga bi mana hale nahaga bu hearuha ibuninaga tandaga holene ira hungualego tiha tagira pugu biagaya.

⁷Bamba wali agali hongohe hearume Anduane Homogo bolangua hole manda bialu hearu ibugua nde ti dara nahene.

⁸Anduane Homogohanda wali agali Lode daluha haga hearuhondo keba timbuniore hene.Tigua mine howa mo ko holene wiaru dewaore bialu heagola ibugua ti dara naheore hene.

⁹Anduane Homogohanda wali agali Kenana dindiha dindi anduane bu hearu ti ko buleneme mo ko hai hene heagola ibugua ti dara nahe bo taliatagi hai hene.

¹⁰Ani bialu ibugua wali agali daosini dege handari waragaria (600,000) dindi ko wali agali nahaga iba dalu naibaga wiagoha pialu hearu dara nahene. Tigua ibunaga bi mana lo wiaga mo wahayagola anidagua bini.

¹¹Ani bialu wali agaliyaguabi mine haga mbira heagua ogoni ibubi pani nalu ibuha mo ko holene ngola ha dege bulebira. Ani bulebirago irane Anduane Homogo ibu dara holene irane nawini dege dara haga kagoyu ibugua kebabi haga dege ka. Ibugua dara halu keba timbunibi ha dege biaga ka.

¹²Ibunaga dara holene timbuni ibalu ibunaga kebabi timbuni dege haga. Ani bialu wali agali tinime bialu hayadadagua manani howa mo tale bigi bulebira.

¹³Wali agali mana ko biaga karu ti mbirale mo page buwa yu haga bidaru tigua mbirale uruni yalu ibida yopialu polene hariga nawiore ka. Ani bialu wali agali bayale bu karu tiguabi nde tinaga yolo bayale mani mulene ngago mulenaga maliaho hole manga habe naheore.

¹⁴Yolo bayaleaore dara holene irane nawini dara hagane ngagoha howa tagira ibaga nga. Wali agali tinaga yolo tinaga mini timbuni mini lene holene biabe tinime bialu henedago karulape mo yu holebira.

¹⁷Í̠na ogodagua lalu, I̱ Anduane Homogonaga deni hado kogodago ainde mbirali dahuliya andagaha kagome i̱naga miniha ngogo hendedabe. Wali agali dewa dege bu karu dombeneha i̱ kogo baya hangu aiwa hendedanebe. Anduane Homogohanda mbirale timbuni wabini ngaru dege dombeneha i̱ imaru aidanebe.

¹⁸Anduane Homogohanda godi lole ibirangi dindibi haribi dahuliya andagabi dindi andaneha iba timbuni pedarubi bibahende duru lalu ema biaiore holebira.

¹⁹Anduane Homogo ibu ibalu dindiha de handadali haragola hari timbuni wedarubi dindinaga hongo irane ngarubi mogo lalu gi howa ema biai holebira.

²⁰Anigo wali agalibi mbirame ogoni bulebirago mitangi nabiore ka. Anduane Homogohanda biaga ngago mitangi ho haga mbirali ai kanebe.

²¹Puyabu hongohe puloyu porago ogobida lalu wali agalime handa nabiaga ngadagua Anduane Homogonaga biabe bulenebi dewaore ogonibi handabe naheore nga.

²²Godi tigabiore lagane Anduane Homogonaga ngago ogodagua nga lalu mbirali aiwa latagi holebirabe. Ani bialu Anduane Homogonaga godi amura kaundiaha wiarua lalu aiwa maliaho holeberemibe, lalu bi ogonidagua lolene nawi.

²³Ai wali agali manda nabi mini nawi bu karume anidagua manda biaga ka. Heneneore wali agali lulu howa mbirale bia ko halu bi la ko halu haga karu tigua anidagua manda bu haga ka.

²⁴Waneigini-o hale baya hangu mia howa i̱na bi larogo hale halu manda bu yalimu.

²⁵I̱na í̠naga manda bulene bayaleore ngaru langialu tí baya hanguore lawai holebero.

²⁶Anduane Homogohanda mbirale bambaore bialu heneyaru ibuninaga minime hangu ogodagua bule wini lalu bulene wiago biai hene. Ibugua mbirale mbira wabule howa ogoni ibu ogoriaore helobi ngelobi waberogoni lo manda ala bu bambaho ngelowa wabigi bini.

²⁷Ibugua bibahendenaga tigabi bayaleorebi wiabo howa biabe bialu haabo helo mo tale bigi bialu tini holene wiagoria helaga bini. Gari lolenebi manga holenebi tiha ngola naheore howa tinaga biabe manga halu wanahagaore ka.

²⁸Bibahendeore tini daluha holene wiyadagoria haga haga bida. Ani bialu uruni ti mbirago ibugua Anduane Homogonaga bi mo wanahaga.

²⁹Ani bialu mani Anduane Homogo ibugua dindi bibahendeha handa amunana biai halu dindi bibahendeha ibunaga mbirale wiaru degeme wu to̱lai helene.

³⁰Anduane Homogo ibugua dindi bibahendeha mbirale bayaleru wu tolai helenego ainde mani mbirale uruni homalu lone dindi hai holebira.