Text copied!
CopyCompare
Habo nalolene bi gahenge lo winigo ogo - Siraga

Siraga 5

Help us?
Click on verse(s) to share them!
1Í̠ninaga muni mbirale ngegoha mini hana ho howa í̠na lalu, Ai i̱ karulapeore kogoni, lolene nawigo nalabe.
2Í̠na hame ngego bibahende mbirale í̠ni dimagoliho kego ha biba halu howa
3lalu i̱ aiwa handaya ho holabada, loleni. Irane ogoninaga Anduane Homogohanda í̠ pani ngialu minu baore bulebira.
4I̱na mbirale bia ko harugo ainde mo ko holene mbira i̱ha naibiya, lolene nawigo nalabe. Anduane Homogo ibugua la nabi luore hondo haga ka.
5Í̠nime lo manda bialu, Anduane Homogohanda ko biniru domo wahagayago waha, lalu mana ko ngaru bialu haabo holeni nabibe.
6Anduane Homogo ibunaga dara holene irane nawini howa dara timbuni hagane kago i̱naga ko ngago bibahende domo wahaiore holebira, nalabe. Heneneore ibugua dara holebirago kebabi timbuni dege haga ka. Ani howa ibunaga keba holene timbuni wali agali mana ko biaga bu karuha ibira holebira.
7Anduane Homogo kagoha abaleore dai bulene nga. Horo yawiore dai buliya lowa horo mo baedede nabibe. Anidagua biriyagua Anduane Homogonaga keba holene abaleore ibalu í̠ mini baragola í̠ homalu ereba holigo abale dai bibe.
8Í̠naga biabe ko buwa muni mo wirigoria mini paga howa holene nawiore. Muni ogonime horo hamaro bulene ngangi í̠ mo wialu biamogo nabulebira.
9Puyabu puloyu iriari biragola mabuha ira hedape holene nawi. Ani bialu hariga tara tara pugupugu bulene ngagoha tanabi pupe nahabe. Wali agali mini kirawi howa mana ko biaga karu tinaga mana ogonigo í̠ polene nawiore.
10Í̠naga mini mo iriari bialu mo beregedaga nabibe. Í̠naga bi laregobi bayale tigabi ngaru lalu habe.
11Bi larago abale hale halu ladai nabi emene hondo habe.
12Bi ladai bulene í̠na manda bu hariyagua bi larago ladai bibe. Manda nabi hariyagua nde ne hariga ndibulo holene karulape.
13Bi ibugua wali agalinaga mini mo ko halu mo bayalebi haga dege nga. Ani biagago irane wali agalinaga hegeme dege mo ko haga nga.
14Wali agali bu karume í̠ bi dibudibu hale ho page bialu í̠naga ne hariga ngegome wali agali mende kago mo ko haga ka nalelo holene nga. Ani larogo irane page biaga karu ti taga haga wialu wali agali bi haluki laga karu tiha godi ko tara ngago handa walia holebira.
15Mana ko ngago dameneore bibabahende emene timbuniyaguabi nabibe.