Siraga 44

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

¹Ayu iname agali haguanebi inanaga mamali heneruhondobi ka̱i̱ lo wia holene nga.

²Anduane Homogohanda tinaga mini mo timbuni howa mini lene helalu bambaore howa ibunaga hongo tihondo mo walia halu heneya.

³Maru ti hongohe heagome ti agali mini lene timbuniru haga bialu maru kiniru heneya. Maru ti manda bayalebi howa baya hanguore lawai haga hene. Ani bialu Anduane Homogonaga bi mana latagi halu mbiwia hagaru hene.

⁴Maru ti nde wali agali íbu ngoai ho kago baya hangu mo tiga bialu haru howa wali agali ti hale helo bi bayaleru latagi halu haga hene. Tigua mana lo wini ngagobi tinaga mamali manabi baya hanguore manda biaihe howa ani latagi haga hene

⁵Maru tigua iba gana gahangeru wabu wiyagola marume bi teru baya hangu gilibu wigi biniya.

⁶Maru ti muni mbiraleru dewaorewi howa tini daluni agali haguane howa bayaleore haga biniya.

⁷Wali agali uruni tini daluha heangi mini lene timbuni halu ti homa nabi heangi tini damene bu hearume tinaga mini yaraga haga bialu haga hene.

⁸Maru henedarunaga mini timbuni ayu wiaho wiaabo ho ngagola wali agalime tinaga mini yaraga halu haabo ka.

⁹Anigo maru henedarunaga mini nawi erebaore heneya. Ti homayagola nde ti mitangi holene mbirali naheneya. Ainde tinibi tinaga waneiginibi mbira naheore mbauleya.

¹⁰Ai ayu iname wali agali abale mana bayale bialu haga homeneru wali agalime embeda nahe manda biaho haabo heneru mitangi budai bialu turu hama.

¹¹Mana bayale tigua bialu hene ngago heba tinaga mini heba ti waneiginime yu henego mani yu yobialu waneigini aguanerume yu hama ibinigo nga.

¹²Waneigini tigua Anduane Homogonaga habo nalolene bi lo wini ngago hongo ho yu kagola waneigini aguane maha ho aribia hararume ti abanaga bi lo ngago talialu holebira.

¹³Hameigini ti ariago biba nahe haabo halu tinaga mini ereba nahe wiaabo holebira.

¹⁴Ti homalu tinaga ha̱lo holene baya wiago handa walia halu tinaga mini ereba nahe wiaho wiaabobo bu wulebira.

¹⁵Wali agali bibahendeme mamalinaga manda bayale abale bamba wu henedaru latagi halu kagola wali agali ngoaiho bedarume ti mo turu halu bi lolebira.

¹⁶Inogo ibu Anduane Homogo heba mandagi ibagabu haga henego ainde Anduane Homogohanda dahuliya andaga haru halu pene. Ibugua wali agali mani holebiraru bu mini beregedo halimu lalu mini beregedolene mana biawai hene.

¹⁷Anduane Homogohanda handalu hearia Noa ibu hangu agali tigabi hearia de hendene. Ai wali agali maru hearu mo ko hai hayagola ibu hangu bayale hene. Ani bialu iba li timbuni ogoni hundiyagola wali agali emene dege maru dindini hene.

¹⁸Ani heagola Anduane Homogohanda wali agali iba lime halu mendengi bo wahai nahole lalu Noala habo nalolene bi lo wini.

¹⁹Abarahama ibu wali agali bibahendenaga mamali timbuni mini lene mbira henego ibu ale mende naheore.

²⁰Ibugua Anduane Homogo Daligaore kagonaga bi mana hale howa talialu heagola Anduane Homogohanda ibula habo nalolene bi lo wini. Anduane Homogonaga habo nalolene bi lo winidagoninaga Abarama ibuni tinginini mo wialu ibuha bahondolene ibu wiangi ibugua Anduane Homogonaga bi hale howa talialu haga hene.

²¹Ani bialu heagola Anduane Homogohanda heneneore bulego Abarahamahondo lamialu ibu damene mani hama polebirarunaga minini howa wali agali bibahendeore dindi bibahendeha karu ti mo turu holene wulebira. Ani bialu ibu waneigini aguaneru dewaore iba angeni iba mu ngaligobi holebira. Ani bialu ti ibugua mo yaraga halu hari daligani yakundi kadagua helolebero. Ani bialu dindi timbuni mbira ti mulebero lalu bini. Dindi ogoni iba solowara kira bedago dombeneha ngago ai tubari uyuraha yagi iba Yuberedisi porago tubari wialu pialu dindi wimaro bidagoria tagira polebira, lalu lamini.

²²Anduane Homogohanda Aisaga ibu Abarahama iginiyagola habo nalolene bi ibula lo wia dege bini.

²³Ani bialu mani wali agali mo turu halu mo gumbila holenebi habo nalolene bi lo winigo ogoni Yagabaha lone mo ba unu hene. Anduane Homogo ibugua Yagaba mo turu holeore ngo lalu ibugua dindi tuwu merogola hameigini homberia (12) howa dindi ogoni tuwu ta holebere lalu lamini.