Sinaale 2:4-22

⁴+ o 2:4 Sin 4:31; 10:44-46; Sin 19:6; Mak 16:17*tonde Vavi Vaambuung lukala sil alondpayo lôôt, be lakaas bayêên bu ti ti lavand lohvu Vavi Vaambuung oo wiing-ambe sil lakaas-ato.

⁵De hil Yuda vu taaku pin sen kand navu sapa Anutu be lala dando Yelusalem-ato,

⁶ond lango daandun-anju tombe sil pin lasupin lalaam-ambe daale dango de sinaale-so dakaas sil sen daalêê-jôôto lavand ti ti, om lavindis lôôt.

⁷+ o 2:7 Sin 1:11*Sil pin lavindis-ande kand yu-yuuh lôôt-ambe lanêêl nambe, “Ham gango. Hil pin sen dakaas-anjo sil vu Galili me malis?

⁸Nambe vaati om yiiy nango de dakaas yiiy lavangg sen ataak-aso lako yiiy-ambe yiiy nakaas-ato?

⁹+ o 2:9 2Ti 1:15*Yiiy vu taaku Patia, de Midia de Ilam, osin yiiy vu Mesopotemia de vu Yudia, de vu Kapadosia yuuh Pontas de Esia,

¹⁰de vu Plisia, Pampilia, osin Ijip, de vu Libia vahaan sen ngaaho vu Sailinii-to, de yiiy vu Lom sen yalaam nandôô-jo.

¹¹Yiiy Yuda de hil vaalu sen lako Yuda-te gambum-ato, de yiiy vu Klit osin Alebia, yiiy pin hango de danêêl va bopaata sen Anutu wiing-ato langaah hôôk yiiy lavangg ti ti.”

¹²Om sil pin lavindis lôôt-ambe kand yu-yuuh, tombe yoo lanêêl vu sil nambe, “Vaa-jo dangga nambe vaati?”

¹³Lemu vaalu danêêl sil pale nambe, “Ma-o, lanum wain moos ngeeyaata lôôt.”

¹⁴De Pita naale having sil nomaayuuh-ambe laam tii-to tombe nêêl bopaata vu hil pin nambe, “Ham Yelusalem de ham Yuda pin, sa tatekin vaa-jo vu ham-ambe ham gango le.

¹⁵Hamambe hil-anjo lanum wain ngeeyaata? Malis lôôt. Manyinjo naahen samiinaanôôn-anjo,

¹⁶lemu Joel-ate vakasin bôôy-ato nôôn ak nambe,

¹⁷+ o 2:17-21 Joel 2:28-32*‘Anutu nêêl nambe, “Vu busin taamusin e mem sale aambiing-ambe sate Vavi Vaambuung jakana hil pin, be noom-aso nomaavêêh-aso le daanêêl vakasin langaah, de hamate himbop-aso le lanji mavin, tonde hamate maanggêêm-aso le lanji taahu taahu.

¹⁸Keen, hôôk busin-anju sale aambiing sate Vavi Vaambuung jakana sate hil moow osin vêêh in daanêêl vakasin langaah.

¹⁹Tonde sale aambiing taahu taahu bopaata vu yendak osin saambiing taahu taahu niwêêk vu voon. Nihees de kin osin ahelu,

²⁰de taaku mekaalus e mekanu dôôk, tonde kwaav e nihees dôôk vêêl e mem Omaaho Bop-ate busin bopaataa-to naatok naam.

²¹+ o 2:21 Lom 10:13*Tombe hil pin sen lavand nahôôk Omaaho Bop haalêê-to ond le dôôvu sil.’”

²²+ o 2:22 Jon 3:2*“Ham Islel, ham gango sate vakasin-anjo le, naambe Yesu Nasaalet ond ham alak ni nambe Anutu taato yi vu ham lak taahu taahu bopaata osin niwêêk vaha vaha, de kaandu yi be wiing vu ham ambaam-ato.