Sang'hano 2:4-22

⁴Wanhu wose wamemezigwa Loho Yang'alile na wasonga kulonga kwa ulonzi uyagwe, kamba Loho viyawadahize kulonga.

⁵Ako Yelusalemu kukala na Wayahudi womdumba Mulungu, walawile kila hanhu mwiisi yose.

⁶Viwazihulike nyangi azo, lunhu mkulu luiting'hana hamoja. Wanhu wose wakanganya, kwavija kila munhu kahulika wanhu wamtogole Yesu wolonga kwa ulonzi wake mwenyego.

⁷Wakanganya ng'hani na kulonga, “Wanhu wose wano wolonga, ni wenekae wa Galilaya.

⁸Yokuwaze kabili, kila imoja wetu kowahulika wolonga kwa ulonzi wake mwenyego?

⁹Wayagwe vitwili wolawa Palitiya na Mediya na Elama, kulawa Mesopotamia, Yudea na Kapadokia, kulawa Ponto na Asiya,

¹⁰kulawa Fulugia na Pamfulia, kulawa Misili na banzi za Libiya behi na Kilene. Wayagwe wetu walawa Lumi,

¹¹Wayahudi na wanhu wengile dini ya Kiyahudi, na wayagwe wetu wolawa Kilete na Alabiya lakini kila imoja wetu kowahulika wolonga mbuli ng'hulu ziyatendile Mulungu kwa ulonzi wa kumwetu!”

¹²Wose wakanganya na kwazanywa, waiuza, “Mbuli ino fambulo jake choni?”

¹³Lakini wanhu wayagwe wawageweza, walonga, “Wanhu wano wakoligwa!”

¹⁴Abaho Petulo kema hamoja na watumigwa longo na imoja na kwa sauti ng'hulu kasonga kululongela ulunhu, “Mbwigazangu Wayahudi na mweye mose mukalaga isi ya Yelusalemu, nhegelezeni niwalongele fambulo da mbuli zino.

¹⁵Wanhu wano hawakoligwe, kamba vimugelegeza, sambi saa ndatu ya imitondo.

¹⁶Lakini, gano gago gayalongile mtula ndagu wa Mulungu Yoeli,

¹⁷Mulungu kolonga, ‘Vino vivo vondanhende mna isiku ya uhelelo, Nomgidila kila munhu Loho yangu. Wanenu wa kimbigalo na wakitwanzi wolagula mbuli zangu, wabwanga zenu wolagusiligwa vinhu na Mulungu, wavele wenu wolota nzozi.

¹⁸Ona, hata wasang'hanaji zangu wose wa kitwanzi na wa kimbigalo, nowagidila Loho yangu mna izisiku azo, na wao wolagula.

¹⁹Notenda unzonza kuulanga na vilaguso mwiisi. Hokuwa na damu, moto na yosi,

²⁰Zuwa dogeligwa ziza, mwezi wogaluka mdung'hu kamba damu, ing'hali hainavika siku ija ng'hulu ya kwiza kwa Mndewa.

²¹Abaho, munhu yoyose yompula Mndewa kwa kutazigwa kokomboligwa.’ ”

²²“Wanhu wa Izilaeli! Tegelezeni mbuli zino, Yesu wa Nazaleti kakala munhu wa udahi na kalagusigwa kumwenu kwa unzonza na vilaguso viyatendile Mulungu kubitila kumwake. Mweye wenyego muijuwa mbuli ino kwavija ilawilila bahano hamwenu.