Jantayitakiri 2:4-22

⁴maawoni jinampishiritantapaakari Tasorintsinkantsi. Ari jitanakawo jiñaawaiyitanakiro pashiniyitatsiri ñaantsi, iriitaki Tasorintsinkantsi ñaawaitakaakiriri.

⁵Okanta janta Jerusalén-ki, ari isaikayitziri Judá-mirinkaiti poñaayitachari intaina pashiniki nampitsi. Iriiyitaki pinkathatasorintsiiti.

⁶Ikanta ikimaitakiro poimatapaintsiri, ipokaiyapaakini ojyiki atziri, tii jiyotawakiro oita kantachari, tima ikimathatakiro apaanipaini ñaantsi okaatzi jiñaawaiyiitziri, irootaki iñaani.

⁷Iyokitzi ikantawakaanaka, josampitawakaiyani: “¿Tiima Galilea-jatzi jinatzi ñaawaiyitakirori pashiniyitatsiri ñaantsi?

⁸¿Iitama akimantariri jiñaawaiyitziro añaanipaini aaka?

⁹Tima akaayitakiri jaka Parto-jatzi, Medo-jatzi, Elam-jatzi, Mesopotamia-jatzi, Judea-jatzi, Capadocia-jatzi, Ponto-jatzi, Asia-jatzi,

¹⁰Frigia-jatzi, Panfilia-jatzi, Egipto-jatzi, Africa-jatzi okaakitapai Cirene. Tima akaatakiri iijatzi poñaayitachari Roma, Judá-mirinkatatsiri, kaari Judá-mirinkawitachari pairani.

¹¹Iijatzi Creta-jatzi, Arabia-jatzi. Ari akaatakiri maawoni akimayitakiri jiñaawaiyitantawo añaanipaini, ikinkithatakotziri Pawa itasonkawintantzi”.

¹²Iyokitzi ikantawakaanaka atziripaini, tii jiyotzi iita jiñiiri. Ikantawakaiyani: “¿Oitama jiroka?”

¹³Iro kantacha tzimatsi iijatzi atziri thainkantaniri, ikantayitzi irirori: “¡Ishinkitaiyatyaani jirikaiti!”

¹⁴Ipoña ikatziyanaka Pedro irirori, itsipatakari 11 Otyaantapiroriiti, jiñaawaitanaki shintsiini, ikantzi: “¡Ajyininká! ¡Jerusalén-jatziiti! Pinkimisantawakina onkantya piyotantyaari.

¹⁵Piñaajaantakima iirokaiti ishinkitatya jirikapaini. Tii, tima owakiraa ijinokitapaaki ooryaatsiri.

¹⁶Imonkaatatya josankinatakiri pairani kamantantaniri, Joel-ni, ikantaki:

¹⁷Ikantzi Pawa: Tzimatsi awisatsini iwiyaantapaatyaawoni kitiijyiri. Ari notyaantakiniri atziriiti Notasorinka okimiwaitakawo isakopiroitatyiinirimi. Ari inkinkithatakoyitanaina itomiiti iijatzi irishintoiti. Ari jiñaawiyayitatya mainariiti, Ari imishiyitaki antariyitapaintsiri.

¹⁸Ari nonkimitaakiri mainaripaini jompirayiitari, iijatzi mainawopaini. Notyaantainiri Notasorinka paata, ari inkinkithayitai.

¹⁹Ari jiñiitaki inkitiki kaari jiñiitapiintzi. Jiñaitiro kipatsiki iraantsi, paampari, antawo kachaaryiinka.

²⁰Impoña jiñaitiri ooryaatsiri intsiwakimati, Jiñaitiri iijatzi kashiri inkimityaawo iraantsi, Irootaintsi imonkaataiya kitiijyiri impiyantaiyaari Pinkathari. Tima antawo jowaniinkawo onkantaiya.

²¹Inkaati pairyaanairini Pinkathari, jawintaayitaari, iriiyitaki awisakoshiritaatsini.

²²¡Shirampariiti! ¡Israel-mirinkaiti! Pinkimaiyini nonkanti. Piñagaiyakirini iiroka, jirikaranki Jesús Nazaret-jatzi, iriitaki jotyaantakimiri Pawa. Itasonkawintayitakimi, joñaagayitakimiro okaatzi kaari piñaawitaiyani pairani.